Регулятор ЯИМ ўсиши прогнозларини яхшиламоқда Марказий банк ярим йиллик якунлари натижаларидан келиб чиқиб иқтисодий ўсиш суръатларини қайта баҳоламоқда. Унга кўра энди, хусусан ЯИМ ўсиши йил охирида 5,8-6,8% атрофида бўлиши прогноз қилинмоқда. Шу билан бирга бошқа макрокўрсаткичлар ҳам - истеъмол, инвестициялар, экспорт ва импорт ҳажмларининг юқорироқ суръатларда ўсиб бориши кутилмоқда. Айни вақтда Кредит қўйилмаларининг ўсиши прогнози 20-22%дан 16-20%гача пасайтирилган. Бюджет дефицити, инфляция кўрсаткичи прогнозлари ўзгаришсиз қолган. Шу билан бирга жаҳонда пандемия навбатдаги тўлқинининг кучайиши, коронавирус янги штаммларининг тарқалиши ва бунинг натижасида жойларда маҳаллий чеклов чораларининг кучайтирилиши билан боғлиқ хатар ва ноаниқликлар мавжуд бўлиб, йил якунига қадар иқтисодий фаолликка маълум даражада таъсир кўрсатиши мумкинлиги истисно этилмаган.