Келаётган қишда газ нархи жуда баланд бўлади Техник ва технологик сабабларга кўра тўла-тўкис глобал газ бозори мавжуд эмаслиги сабабли айрим минтақавий бозорларда газ нархининг кескин ўзгариши вақти-вақти билан рўй бериб туради. Лекин бир вақтнинг ўзида бир нечта минтақавий бозорларда газ нархининг ошиши камдан-кам кузатилади ва кўпинча бу газ нархининг барча минтақаларида қимматлашишига туртки беради. Айни шу ҳодиса ҳозир Европа ва Америка газ бозорида юз бермоқда. Шу кунларда спот битимларида газ нархи тарихий максимум - 750 долларга яқинлашмоқда. Тўғри, Осиё, яқин Шарқ ва Россия билан чегарадош ҳудудларда газ нархлари узоқ муддатли шартномаларга, хусусан нефть нархига боғланган. Лекин энергоресурсларнинг асосий истеъмолчиси АҚШ ва Европада газ нархининг кўтарилиши глобал бозорда нефть нархининг ошишига барибир сабабчи бўлади. Табиийки газ ишлаб чиқарувчилар нархларни қайта кўриб чиқа бошлайдилар ва улар учун ички истеъмолдан кўра экспорт каррасига афзал бўлиб қолади. Худди шу ҳодисани Россия ва газ ишлаб чиқарувчи Марказий Осиё мамлакатларида 2007-2008, 2012-13 йилларда кузатиш мумкин бўлган.