​Юқори октанли бензин калькуляцияси эълон қилинди: Қайтанга саволлар кўпайгани қолди Бензин нархлари ошиб бораётгани ортидан импорт нефтдан ишлаб чиқарилаётган автобензин нархи калькуляцияси эълон қилинди. Қайд этилишича, импорт қилинган нефтдан ишлаб чиқарилган юқори октанли бензин 8893 сўмга тушмоқда. Бунда бензин айнан қайси октанга тегишли экани маълум қилинмаган. Калькуляцияда заводгача транспортировка ва республика ичидаги транспортировка харажатлари жуда баландлиги эътиборни тортади. Гўёки биз нефтни Венесуэладан самолетда импорт қилаётгандекмиз ва Республика ичидаги транспортировка эса биз Ўзбекистондай кичик республикада эмас, масалан бепоён Канадада истиқомат қилаятганимиздек таассурот уйғотади. Яна бир ҳолат, калькуляцияда энг қиммат брент типидаги бензин нархлари олинган. Ҳисоб-китобларда ишлатилган 80 долларлик нарх бу аввало ноябрь фьючерсларининг нархи, асло октябрники эмас. Қолаверса, Ўзбекистон аъло навли брент типидаги нефтни эмас, асосан Туркманистондан анча кир ва сифати паст бўлган нефть сотиб олади. Бу маркадаги нефть нархи брент типидагисидан 15-20 фоизгача арзонроқ юради. Умуман олганда мазкур эълон қилинган калькуляция нега Қозоғистондан импорт қилинаётган 92 маркали бензин Ўзбекистонда ишлаб чиқарилаётган 92 маркали бензиндан арзонроқ тушаётганига тушунтириш бера олади. Ишлаб чиқариш ва транспортировка харажатлари ўта қиммат ва монополист рақобатчилар бўлмаса ўзини ўзи харажатларни қисқартиришга мажбурлай олмайди. Қолаверса монополист табиатан самарасиз! Дарвоқе, билдирилган муносабатда биржа савдоларида 10 дан ортиқ сотувчилар автобензин маҳсулотини таклиф этаётгани қайд этилган. Лекин негадир монополистдан ташқари биржа иштирокчиларининг улуши айтилмаган. Чунки уларнинг улуши статистик хатолик даражада кичик миқдорда. Шунинг учун биржа савдоларидаги асосий ўйин қоидалари ва ҳароратни барибир монополист белгилашда давом этмоқда. Шундай экан, бензин нархи ошишда давом этади. @the_bakiroo