Достоевский романи учун сюжет бўлиши мумкин фожеа Қувасой шаҳрида эр-хотин 32,5 млн сўм қарздорликни ундиришга келган МИБ ходимларига қаршилик кўрсатиб, чақалоғининг устига бензин сепиб, ёқиб юбориш билан қўрқитди. Уларга нисбатан Жиноят кодексининг ҳокимият вакилига қаршилик кўрсатиш ва ҳақорат қилиш моддалари билан иш очилди. Агар замонавий насримизда ижтимоий оғриқни сезадиган ёзувчилар бўлганида ва улар 21- асрнинг иккинчи ўнйиллигини тасвирлашга ҳамиртуруш қидирмоқчи бўлса узоққа бориш шарт эмас. Кўчага чиқиш кифоя бўлади. Типик сюжет. Эр ё хотин ишсиз. Даромадлар харажатларни қоплашга етарли эмас. Қолаверса, муҳит ва бозор истеъмолчиликка тинимсиз ундаб турса, кредит, қарз кўтарасан. Янги чиққан телефон, Джентра, қиммат кийим-кечак. Ўзингда йўқ нарсани бор қилиб кўрсатасан. Эски кийим - уят, пиёда юриш - уят, 50 кишилик тўй қилиш - уят. Ижтимоий Уят моралга айланади. Уятлар устидан қарз билан босиб ўтилади, яна ўтилади. Кейин уят ва мораль ўрни алмашиб қолади. P.S. Нега эр-хотин ўзининг ё бир-бирининг эмас, чақалоғининг устидан бензин сепган, деган савол туғилиши мумкин. Ўзини ўзи асраш инстинктидан фарзандни асраш инстинкти кучлироқ одатда. Лекин жамият қайсидир фуқаро ўзининг устидан бензин қуйиб таҳдид қилиш босқичидан ўтиб бўлди. Ҳаракатни тўхтатиш учун таҳдидни янги даражага олиб чиқиш керак эди ва бу юз берди.