Сўм-купон муомалага киритилганига 28 йил бўлди
1993 йил августига келиб, Россия Федерацияси ўзининг Россия рублини муомалага киритгач, совет рубль зонаси де-юре ўзининг аҳамиятини йўқотганди.
Лекин Ўзбекистон, Қозоғистон Туркманистон, Тожикистон, Арманистон совет рублини тўлов воситаси сифатида ишлатишда давом этган. Бошқа собиқ совет республикалари 1993 йил августга келиб ўзининг валюталари ёки эрзац (вақтинчалик) валюталарини муомала киритиб бўлишганди.
1993 йил август-ноябрь ойларида совет ва Россия рубли ўртасидаги курс фарқи фақат ошиб борган. Мисол учун 1993 йил августда 1 Россия рублига 1,5 совет рубли таклиф этилган бўлса, 1993 йил ноябрга келиб 1 Россия рубли 5 совет рублига алмашган.
Саналган давлатлар Россия рублини умумий валюта сифатида ишлатишда давом этишга жуда кўп бора уринишган. Масалан, Ўзбекистон бу ҳақда Россия билан 1993 йил 10 сентябрда битим ҳам имзолаган. Лекин қатор сиёсий талаблар ва айниқса эмиссия қилиш функциясининг Ўзбекистонга тақдим этилмаслиги якунда рубль зонасини тарк этишга мажбур қилган. Каримовнинг Кремлга муносабатларининг қатъийлашуви айнан валюта билан боғлиқ масалалардан бошланган дейилса, хато бўлмайди.
Бу орада Ўзбекистон ва Қозоғистон ягона ўтиш валютасини муомалага киритиш масаласини ҳам муҳокама этган. Лекин бу режалар ҳам амалга ошмаган.
Шундай қилиб, Россия рубли зонасида қолиш ва бошқа режалар иш бермагач 1993 йил 12 ноябрдаги ҳукумат қарори билан 1993 йил 15 ноябрдан бошлаб ўтиш валютаси сўм-купон муомалага киритилган.
Сўм-купон миллий валюта сўм муомалага киритилгандан кейин ҳам яна бир ой, яъни 1994 йил 1 августгача муомалада бўлган.
Эътиборлиси, сўм купоннинг бошқа валюталарга нисбатан расмий курси худди Россия рублининг бошқа валюталарга нисбатан курси сингари, бир хил кўринишда ўрнатилиб бораверган. Лекин бу курсда ҳеч ким сўм-купонга валюта сотмаган ёки сотиб олмаган.
1993 йилнинг 31 декабрида 1 АҚШ доллари 1250 рубль атрофида бўлган. Қора бозордан АҚШ долларини 8000 сўм-купонларга сотиб олса бўларди. Яъни, 1 Россия рублнинг бозор қиймати 6,5 сўм-купон қийматида бўлган.