​Танзила Нарбаеванинг блокланган твиттерга 70 кундан кейин қайтиши фойдаланувчиларга далда берди Кеча оқшом ўзбек твиттери учун энг асосий воқелик Сенат Раиси Танзила Нарбаеванинг деярли 70 кунлик танаффусдан кейин твиттер саҳифасида ёзган твитлари бўлди. Твиттер фойдаланувчилари ҳам, журналист Шуҳрат Латипов ҳам, ҳозир истеъфода бўлган Муҳрим ҳам бу воқеликни шундоқ қолдириб юборишни исташгани йўқ. Билмадим, нимага, балки Танзила опа твиттердан фаол фойдаланувчи бўлгани учунми, тармоқдагилар унинг қиёфасида ўзтвиттернинг эҳтимолий ҳимоячисини ҳам кўрадилар. Шунинг учун имконият бўлди дегунча ундан твиттерни блокдан чиқаришни сўрайдилар. Лекин ҳозирча ўзбек пахтасини блокдан чиқаришда катта ўринга эга бўлган Танзила Нарбаева ўзбек твиттерини тақиқлардан озод қилиш борасида бирон бир расмий баёнот берганича йўқ. Балки зимдан бу борада кураш бошлагандирлар ҳам, ким билади.