"Бизга ҳозир тушум ошиши асосийси эмас" Кеча Давлат раҳбари солиқчиликни такомиллаштириш бўйича кўп муҳим фикрларни баён этипти. Янграган асосий мужда шуки, бизга ҳозир тушум ошиши асосийси эмас. Бу дегани приоритетда солиқнинг рағбат функцияси бўлиши керак, ҳар қандай йўл билан солиқ ундириш эмас. Солиқ маъмурларимиз буни тўғри тушунганларига умид қиламан. Иккинчи чақириқ солиқ юкини 25 фоизгача камайтириш билан боғлиқ. 2022 йил бюджетида даромадларнинг, яъни солиқ юкининг ЯИМга нисбати 30,3%, харажатларнинг ЯИМга нисбати эса 33,4%дан иборат этиб белгиланган. Бу биз каби даражадаги давлатлар учун жуда оғир юклама. Солиқ юкини камайтириш энг аввало бюджет харажатларини камайтиришдан бошланиши керак. Бусиз олдинга қадам ташланмайди. Учинчи муҳим масала ҚҚСни келаси йилдан камайтириш билан боғлиқ. Назаримда шу ишни келаси йилга қолдирмаслик зарур, инқирозга қарши чоралардан бирининг калити айнан ҚҚСни шу йилнинг ўзиданоқ 12%гача пасайтириш, унинг қамровини кескин кенгайтириш, имтиёзларни тўлиқ бекор қилиш бўлиши керак.