Мисли кўрилмаган харажатлар бюджети Ниҳоят 2022 йил учун Бюджетнома билан танишиб чиқишга улгурдим. Бизни яқин келажакда қандай марралар кутаётганини ва нималардан умидвор бўлмаслигимизни билиш учун ҳам ҳужжат билан танишиб чиқиш керак бўлади. Бир сўз билан айтганда янги 2022 йил бюджетини харажатлар бюджети, мисли кўрилмаган харажатлар бюджети, деб атаса бўлади. Бу борада 2022 йил бюджети шу кунгача барча даврларнинг энг серхаражат бюджети ҳисобланган 2021 йилни ҳам, ундан аввалги йилларни ҳам бир тупуриб ортда қолдиради. Консолидациялашган бюджет харажатлари ЯИМнинг 33,3%ига етиши кўзда тутилган. Бошқача айтганда, давлат иқтисодиёт яратадиган ҳар уч сўм қийматнинг бир сўмини тортиб олади ва ўз билганича қайта тақсимлайди. Бюджетда Харажатларни камайтириш, давлатнинг иқтисодиётга юкламасини мақбуллаштириш ҳақида бирон жиддий ҳаракат тугул, ишора ҳам кўринмайди. Лекин биринчи марта Бюджетномада Фискал қоидаларни бюджет қонунчилигигига киритиш ҳақида сўз очилган. Шу маънода Бюджетноманинг 4.1. бандини алоҳида ўқиб чиқишни тавсия этаман. Лекин унда айтиладики, харажатлар бўйича фискал лимит белгилаш бўйича "Ҳукуматнинг харажатлар бўйича мажбуриятлари тез-тез ўзгариб туриши сабабли ҳозирги босқичда тавсия этилмайди" дейилган. Рости-русти. Яъни ҳукуматнинг ўзига ишонч йўқ, у ўзини ўзи тиёлмайди (тийиш вазифаси бўлган парламент тиймагач қанақа қилиб ҳукумат ўзини тийсин?). 2021 йилнинг ўзида бюджет уч марта авра-астари чиқарилиб ўзгартирилди. Эрталабки баёноти оқшомги ҳаракатига мос бўлмаганлардан яна нима кутиш мумкин? Келаётган ҳафта пештоқига парламент деб ёзилган орган 2022 йил бюджетини иккинчи ўқишда кўриб чиқишни бошлаши керак. Катта эҳтимол, ҳукуматнинг маъқулловчи иловасига айланиб қолган фасад парламент бирон бир изоҳсиз бюджетни қабул қилади. Шунинг учун вазифа яна ўзимизнинг зиммамизда. Бюджетнома билан албатта танишинг, саволлар беринг. Чунки бу пуллар, тақсимланаётган пуллар сизники.