Депозитлар қолдиғи февралда ҳам қисқаришда давом этган Ўзбекистон банк тизимида иккинчи ойдирки жами депозитлар қолдиғида камайиш кузатилмоқда. Январда бошланган мазкур жараён февралда ҳам давом этган. Февралнинг 28 кунида жами депозитлар қолдиғи январь якунига нисбатан 1,2 трлн.сўмга камайган. Хусусан, корпоратив депозитлар 2 трлн.сўмга камайган бўлса, чакана депозитлар қолдиғи 0,8 трлн.сўмга ўсган. Давлат банклари орасида жами депозитлар қисқариши Миллий банк (-958 млрд.сўм), Ипотекабанк (-937 млрд.сўм) ва Агробанкда (-299 млрд.сўм) энг сезиларли бўлган. Хусусий банклар орасида Капиталбанк (-421 млрд.сўм), Ипак йўли банки (-208 млрд.сўм) ва Инвест Финанс банкда (-122 млрд.сўм) депозитлар қолдиғининг камайиши энг баланд бўлган. Гарчи февраль банкларда депозитлар жамғариш учун мураккаб келганига қарамай, айрим банклар бу борада яхши натижаларга эришишган. Давлат банкларидан Ўзсаноатқурилишбанк (+525 млрд.сўм), Алоқа банк (+284 млрд.сўм) ва Қишлоқ қурилиш банк (+234 млрд.сўм) фаоллик кўрсатган бўлса, хусусий банклардан ЎзКДБ банк (+439 млрд.сўм), Траст банк (+231 млрд.сўм) ва Анорбанк (+222 млрд.сўм) энг юқори натижаларга эришган. Ўзбекистон банкларида депозитларнинг кескин концентрациялашуви, корпоратив ва чакана депозит бозорларининг ўзаро автономлиги ва айрим депозит сегментларига киришда маъмурий талабларнинг юқорилиги, давлат ва бюджет ресурсларини тақсимлашда давлат банкларига устуворлик берилиши вақти-вақти билан диспропорцияларни яратиб туради.