​Инфляция хавотирлари яна қайтди Март ойи якуни бўйича аҳолининг инфляцион кутилмалари 15%гача (+1,0%), бизнеснинг кутилмалари эса 15,4%гача (+0,8%) ошди. Инфляция ошиши бўйича аҳолининг энг катта хавотирлари ўлароқ валюта курсининг ўзгариши (54 фоиз), импорт товарлари ҳамда асосий озиқ-овқат маҳсулотларининг қимматлашиши (49 фоиз) ҳамда нархларнинг сунъий оширилиши (37 фоиз) саналган. Бизнес ҳам энг аввало валюта курсининг ўзгариши (51 фоиз) нархлар ошишига асосий туртки бўлишидан ташвишланмоқда. Кейинги эҳтимолий сабаблар ўлароқ ёқилғи ва транспорт хизматларининг нархлари қимматлашиши (36 фоиз) ҳамда ташқи иқтисодий шароитлардаги ўзгаришлар натижасида хориждан импорт қилинадиган хомашё ва бутловчи қисмлар қимматлашиши (22 фоиз) қайд этилган. Одатда инфляцион кутилмалар сезилган инфляция юқорилаган ойларда кўтарилиб кетади. Март ойи айнан шундай ой бўлди. Ҳар ойлик сўровномаларда сезилган инфляция бўйича анкета саволлари сақланиб қолаётган бўлса-да, унинг натижалари ўтган йил октябрь ойидан буён эълон қилинаётгани йўқ.