Манфаатли хаос Кейинги йилларда Ўзбекистонда шундай "бизнес" тури роса авж олди. Ундан ҳамма зиён кўради. Фақат 3-4 та топ-чиновник ва уларнинг гумашталаридан бошқа. Бирдан тайёр миллиардлик бизнес ва унинг оқимларига эга бўлиш учун Ўзбекистонда нима қилиш керак? Бозорга ва рақобат киришиш керак дейсизми? Йўқ. Бунинг учун ҳукумат ва ҳокимиятнинг керакли кабинетлари эшикларини топиб кириш ва ҳар қандай қонун, фармон ва қарорларни четга суриб юбориш қудратига эга протоколларни расмийлаштириб олиш кифоя. Газетаўз ёпиқ кабинетларда ҳукумат, ҳокимлар ва уларнинг шериклари иштирокида тузилган махфий протоколлар воситасида Кластерларни эгаллаб олиш схемалари ҳақида эътиборли мақола тайёрлапти. Эсингизда бўлса, янги эпоха бошланишида виртуал қабулхонага бир ажойиб мурожаат келиб тушган ва бу мурожаат жамоатчиликнинг кулгусига сабаб бўлган эди. "Йўқ демасангиз, мен мой алмаштириш шохобчаларини юргазмоқчиман. Шунга Арча-кўчада Castrol деган шохобчани менга олиб берсангиз. Эгаси неча йилдан бери фойдаланади ахир. Мен ҳам бой бўлайин дегандим", - деб ёзган эди мурожаат муаллифи. Гап шундаки, моҳиятан бизнесга шу кўринишда қараш янги даврда кулгули эмас, амал қилиб келаётган тезислардан бири бўлиб қолди. "Сен сурил энди, менинг навбатим келди, чунки тепада кабинетларда менинг акаларим ўтирипти, улар бугун бор, эртага йўқ, вазиятдан фойдаланиб қолишим керак" деган принциплар нормалашиб улгурди. Нима учун Ўзбекистонда иқтисодий ўсиш ўрнига хаос, фаровонлик ўрнига турғунлик, қонун устуворлиги ўрнига куч намойиши, мулк ҳуқуқи ўрнига ниқобланган рейдерлик истиқболлари кўпроқ ўринга бўлиб бораётганини ва бунинг оқибатларини ўзингизга тасаввур қилиб олаверинг.