СберБанк Онлайн иловаси Google Play'дан ҳам ўчирилди Санкциялар туфайли Android платформасидаги СберБанк Онлайн иловасини Google Play дўконлари орқали юклаб олиш ва янгилаш имконияти тўхтатилди. Кеча App Store дўконлари орқали iOS платформасидаги СберБанк Онлайн иловасини юклаш ва янгилаш чекланган эди. Катта эҳтимол, санкция остидаги бошқа рус банкларининг иловаларини ҳам шундай тақдир кутади. Аввалроқ хорижий интернет дўконлар Россия банклари тарафидан чиқарилган UnionPay карталари орқали тўловларни қабул қилмаётгани ёки блоклашни бошлагани ҳақида маълумотлар тарқалганди. Visa ва Master card Россияни тарк этгач, UnionPay ташқи дунё билан онлайн тўловлар учун ягона дарча канали бўлиб қолаётганди. Айрим мамлакатлардаги савдо ва пуллик хизмат кўрсатиш нуқталари россияликларнинг Visa ва Master card карталарини тўлов учун қабул қилмаётгани ҳолати кўпайган, гарчи карталар Россиядан ташқарида, масалан, Ўзбекистонда ёки Қозоғистонда чиқарилган бўлса ҳам.