Эронда озиқ-овқат ғалаёнлари юз бермоқда. Россиянинг бунга нима алоқаси бор? Гарчи расмий хабарлар тарқатилмаётган бўлсада, шу кунларда Эронда, айниқса чекка провинцияларда озиқ-овқат нархларининг кескин ошиб кетганига қарши намойишлар бўлиб ўтмоқда. Ўзи бусиз ҳам юқори бўлган Эрондаги инфляция кейинги ойларда янада баландлаган. Айниқса ун, ёғ, сут, тухум каби озиқ-овқат нархлари каррасига ошиб кетган. Президент Раиси норози халқ вакиллари билан шахсан ўзи учрашган. Гарчи нархлар ошганига сабаблар ўлароқ субсидияларнинг бекор қилиниши кўрсатилаётган бўлсада, геосиёсий зиддиятлар ортидан глобал логистика занжирларининг узилиши бош триггер ролини ўтамоқда. Украина дони ва озиқ-овқат маҳсулотлари экспортининг бош йўналиши Яқин шарқ ва Форс кўрфази давлатлари ҳисобланади. Бошқача айтганда, Украинадаги урушдан ижтимоий-сиёсий зиён кўраётган давлатлардан биринчиси айнан Эрон бўлмоқда. Бекорга бугун Германия ташқи ишлар вазири Бербок Россияни атайин буғдой кризиси яратишда айблаётгани йўқ. Украина портларида 500 минг тоннадан ортиқ ғалла блокланган ҳолда қолмоқда, босиб олинган ҳудудларда 400 минг тоннадан ортиқ ғалла оккупантлар тарафидан ўғирланган, талон-тарож қилинган. Уруш ҳаракатлари кетаётгани учун ғалла экиш майдонлари 30 фоизгача кам бўлиши кутилмоқда. Украинадаги уруш оқибатларидан қўрқувлар туфайли кеча Ҳиндистон ҳам ғалла экспортига тақиқлар қўйган. Маълумки, Ҳиндистон дунёдаги иккинчи рақамли ғалла етиштирувчи ҳисобланади ва апрель ойида энг кўп ғалла экспортини айнан Ҳиндистон амалга оширганди.