​Эҳтимолий ядровий талофатлар сценарияси кўзда тутилмаган: Россия Марказий банки пул-кредит сиёсати асосий йўналишларини янгилади Украинага уюштирилган агрессиядан кейин тўкилиб тушиши кутилган Россия иқтисодиёти каркасларини сақлаб қолишда ҳаддан ташқари муҳим рол ўйнаган Россия Марказий банки 2023-2025 йиллар учун пул-кредит сиёсати асосий йўналишларини қайтадан янгилаган. Олдинга ўтиб айтиш жоизки, молиявий доираларда тан олинган профессионал ёндашувга эга Марказий банк раҳбарияти рус босқини келтираётган одамхўрлик, зўравонлик ва ваҳшийликларни иқтисодий қарорлари билан қувватлашда давом этмоқда. Бир кун келиб Путин режими халқаро трибуналга тортилганида унинг ёнида қора кийимни хуш кўрадиган қўли қон банкирлар ҳам албатта бўлади. Пул-кредит сиёсатига қайтсак. Асосий сценарийга кўра, 2022 йил якуни бўйича инфляция 13%гача етиши мумкин. ЯИМ 6%гача қисқаради. ЯИМнинг қисқариши 2023 йилда ҳам давом этади. Глобал таназзул деб ном олган альтернатив сценарийга кўра, Россия иқтисодиётининг қисқариши 2025 йилгача давом этади. Россия рублининг қадрсизланиши давом этиши фонида 2023 йилда инфляция 13-15%гача етади. Мулоҳазалар ва далилларни келтиришда бирон марта уруш ёки можаро сўзи ишлатилмаган. Сценарийларда урушнинг давом этиши, хусусан, Путин режими тинимсиз такрорлаётган ядровий истиқболлар инобатга олинмаган.