Пойтахтда ижара кескин қимматламоқда Тармоқ ва пабликларда ижарачилар ижара нархлари оширилгани ҳақида квартираларнинг эгаларидан огоҳлантириш олишаётгани бўйича хабар ва изоҳлар қолдиришмоқда. Бу ўтган дам олиш кунлари твиттер ва фейсбукда муҳокамада бўлган асосий мавзулардан бирига айланди. Ўзбекистонда ижара шартномалари тузишда ижара нархларини реал қиймати ва томонларнинг мажбуриятлари аниқ кўрсатилмайди, шунинг учун ижарачилар кўпинча уй эгасининг янги шартларига кўнишга мажбур бўлишади. Ижарачи ва уй эгалари ўртасидаги аввал келишилган нархларнинг кескин ўзгариб бораётганига Россиядан келаётган қочоқларнинг таъсири ҳаддан зиёд бўлмоқда. Kommers.uz'нинг ёзишича россияликларнинг оқими сабабли пойтахтда квартираларнинг ижара нархлари сўнгги икки ой ичида икки баробарга қимматлашди. Бу қайси сегментга ёки қайси туманга оид таҳлиллар эканига аниқлик киритилмаган. Тошкентга келган ва келаётган россияликларнинг телеграмдаги канал ва гуруҳларидаги муҳокамалардан сезиш мумкинки, Тошкент уларнинг кўпчилигига аллақачон қимматлик қилмоқда. Айрим фойдаланувчилар ўзлари учун Тошкент вилоятининг Чирчиқ, Ангрен шаҳарлари, вилоят марказлари бўлган Фарғона, Қарши, Урганч каби шаҳарлардаги нархлар ва инфратузилма сифати билан қизиқишни бошлашган.