​Зўравонлик макони. Ҳукумат жим, демак, бу мумкин деганими? "иккита Spark машинасида юк машинамизнинг йўлини қўпол равишда тўсиб тўхтатишди". "кишан солиб қамоққа тиқишни буюрди". "Укам жонҳолатда ерда ётарди. Тили ичига кетиб қолган экан". “Ҳушимни йўқотдим. Кўзимни очсам, жарроҳлик бўлимида ётибман". Иқтибослар уюшган жиноятчиликка қарши олиб борилаётган криминал хроника маълумотлари эмас. Фермерларнинг ўз пахтасини тузилган шартнома бўйича бошқа туманга олиб ўтишда қўлланилаётган қароқчилик ва зўравонлик тафсилотлари. Йил бошида айрим зўравон ҳокимлар раҳбарлигидаги вилоят ва туманларда бу рўй беришини прогноз қилган эдик. Лекин қароқчилик бутун республикада авж олиши, тўғриси, кутилмаган ҳол бўлди. Президент имзолаган фармонга кўра, пахта етиштирувчи фермерлар бир вилоят ҳудудида исталган бошқа кластер билан ишлашига ва фьючерс контрактациясини амалга оширишига тўла ҳаққи бор. Лекин бу норма амалда ишлаётгани йўқ. Қайсики фермер ўз пахтасини бошқа туманга, бошқа кластерга сотмоқчи бўлса (шартнома асосида) ё калтакланаяпти ё камида турли оқибатлар билан қўрқитилаяпти (энг катта қўрқитиш ер тортиб олиш билан боғлиқ). Афсуски бу зўравонликлар одатий ва тизимли ҳолатга айланганига қарамай на Қишлоқ хўжалиги вазирлиги ва на Ҳукумат номидан бирон марта воқеаларга нисбатан муносабат билдирилгани йўқ. Табиийки савол туғилади, тепада ҳамма жим экан, демак, бу мумкин деганими?