Ёпиқ. Йил сўзи 2022 йилнинг ўтган даврида энг кўп, энг оғриқли, энг саволли масалаларни ёритишда ишлатилган оммабоп калимамиз ЁПИҚ сўзи бўлипти. Мулоҳазаларимизда ишлатилиши бўйича Ёпиқ сўзи аллақачон эскириб, охори тўкилган, эгасига қўшилса истеҳзо яратадиган Янги сўзини ҳам ортда қолдирган. Янги Ўзбекистон таъбир жоиз бўлса, бизнинг назаримизда Ёпиқ Ўзбекистонга айлана бошлади. Хўш, ўтаётган йилда Ўзбекистонда нималар, қайси жараёнлар ёпилди, қай соҳаларда ёпиқлик тенденцияга айланди? Иқтисодий жараёнлар бўйича олсак, хусусийлаштириш, айниқса йирик хусусийлаштириш тўла-тўкис ёпиқлик тусини олди. Сотилган энг йирик учта актив "Ипотека-банк", Талимаржон ИЭС ва Биринчи резинотехника заводи мисолида ёпиқ битимлар буни яққол кўрсатади. Кўрпа ё эшик ортида хусусийлаштириш мисолларини яна узоқ санаш мумкин. Лекин юқоридаги уч мисол умумлаштирувчи ўлароқ аниқ тарихга киради. Ёпиқ ва тор битимлар хусусийлаштириш мафкураси ва сиёсатини буткул обрўсизлантирди. Йил охирига келиб янги дейилган даврда очиқлиги билан ном қозонган бюджет жараёнлари ҳам тўла ёпиқ тус ололди. Бюджетнома бўйича Ҳисоб палатасининг хулосаси эълон қилинмади. Бюджет паразитлиги билан янада машҳурлашган UzAuto Motors учун қўшимча субсидия ажратиш масаласидаги ёпиқлик ва намойишкорона беписандлик айниқса яққол кўринди. 2022 йилда тийиқсиз ҳокимлар ўзларининг ёпиқ қарорлари билан янада қутурди. Қайси масалада пул тақсимоти, давлат буюртмаси ё танловсиз ўзлаштириш бўлса, ўша қарорлар шахсга оид, давлат ва ҳарбий тусга эга дея махфийлаштирилди. Ҳукумат танага яқин бизнес ва олигархия учун ёпиқ қарорлар асосида имтиёзлар, буюртмалар беришига ўтган йиллардаёқ кўникиб қолганмиз. Лекин бу йил ёпиқлик сояси Президент қарорларига ҳам етиб келди. Ёпиқлик туби кўринмаётган энергетикада, ахборот беришда, корпоратив бошқарувда, статистикада ва бошқа кўплаб соҳаларда ҳаётимизнинг бир қисмига айланиб бўлди. Ва энг ёмони биз бунга кўникдик. Кўниктирилдик. 2023 йилдан бошлаб ёпиқликдан кейинги босқичга қадам қўйса бўлаверади энди. Дарвоқе, ёпиқликдан кейин биқиқлик бошланади. @the_bakiroo