Учинчи ёки тўртинчи уруниш UZCARD ва HUMO тизимлари инфратузилмасининг интеграцияси масаласи UZCARD 75%лик назорат пакети давлат банклари ихтиёрига қайтарилган 2020 йил сентябрдан буён янграб келарди. Чунки икки давлат назорат остидаги тизимнинг умумий маҳражини топиш анча осон кечиши табиий эди. Ҳаттоки 2 йил аввал бу ҳақда UZCARD ва HUMO ўртасида меморандум ҳам имзоланган. "Инфратузилмаларнинг интеграцияси карта эгалари, банклар ва бизнес эгаларига сезиларли фойда келтиради. Харидорларнинг савдо нуқталарига келгач қайси терминаллардан фойдаланиш мумкинлиги ҳақидаги ўйлари йўқолади, тадбиркорлар эса иккала картадан тўловларни битта терминал орқали қабул қилишлари мумкин бўлади", - деган эди HUMO етакчиси Шуҳрат Қурбонов. 2021 йил охирига қадар терминаллар иккала турдаги карталарни қабул қилишни бошлаши кутилмоқда, деган баландпарвоз режаларга қарамай, жараён 2022 йилда ҳам, 2023 йилда ҳам якунига етмаган. Ўтган йили ёзда, 2022 йил июлда Марказий банк раҳбарияти интеграция қийин кетаётганини тан олганди: «Бу [жараён] бирмунча қийин кетяпти… Чунки, қийин дегани нима учун — хусусий компания. Унинг маълум бир қўядиган шартлари бизнинг Humoга тўғри [келмайди]… Humoда ижтимоий аҳамиятга эга жуда кўп операциялар бор, яъни фоиз олмайди, комиссия олмайдиган операциялар кўп". Айтиш керакки, ушбу баёнот берилган вақтда UZCARD хусусий эмас, ҳали давлат назоратида эди. UZCARD "хусусийлаштирилиши" амалда 2022 йил сентябрда эълон қилинган. 2023 йил январда Марказий банк Humo ва Uzcard интеграцияси бўйича келишувга эришилганини яна бир марта эълон қилди. "Май ойигача банкоматларни интеграция қилиш бўйича технологик жараённи бошладик. Иккинчи этапимизда терминалларимизни интеграция қилиш бўйича режаларимиз бор", деган фикрлар янграганди ўшанди. Бугунги қарор катта эҳтимол айни шу охирги баёнотларни ҳуқуқий ҳужжат сифатида расмийлаштирмоқда. Тўғриси, уч йилдан буён чўзилаётганига қарамай, агар бу транзакцион харажатларни қисқартиришда рўй берса жуда муҳим қадам бўлади. Шахсан мен токи HUMO ҳам бирон чўнтакка яқин корчалонга "хусусийлаштириб" берилмагунча бу иш рўй беришига ишонмай келаётгандим.