Сув танқислигининг биринчи зарбаси шоличиликда акс этади Энг кўп шоли етиштириладиган шимолий минтақамизда шоли экиладиган майдонларни ўтган йиллар билан солиштирганда икки баробардан кўпроқ қисқартириш мўлжалланмоқда. Шунингдек, шоли етиштиришни фақат учта туманга жойлаштириш режалаштирилган. Яъни шоли майдонларини қисқартириш пропорционал тарзда рўй бермайди. Йил бошидаги режаларга кўра, Республика бўйича жами 528,2 минг тонна шоли етиштириш прогноз қилинганди. Шундан 147.3 минг тонна Қорақалпоғистон, 144,7 минг тонна Хоразм вилояти ҳисобига тақсимланган. Янги режаларга кўра, энг шимолий ҳудудимизда прогноздан 2,5 баробарига кам, 60 минг тонна атрофида шоли етиштирилади. Ҳозирча Хоразм ва бошқа вилоятлар қирқимида шоли етиштириладиган майдонлар ва ҳажмларни қайта кўриб чиқиш бўйича бошқа биронта очиқ ҳужжат ёки лойиҳа эълон қилингани йўқ. Муаммо нафақат ижтимоий ва иқтисодий, балки бизнес ва хўжалик юритишга оид ўзгартиришларни ҳам талаб қилади. Шоличилик кластерлари ва шоличилик фермер хўжаликларининг янги шароитларда фаолияти ёки трансформацияси масаласи Республика даражасида кўриб чиқилиши керак бўлади.