Хитой автомобилларидан хитой кредитларигача Хитойга ташриф давомида икки давлат раҳбарлари иштирокида 41та йирик битим имзолангани айтилмоқда. Келишувлар орасида “EXEED” компанияси билан биргаликда замонавий автомобиллар ва “BYD Auto Industry” компанияси билан биргаликда электр ва гибрид автомобиллар ишлаб чиқариш тўғрисидаги битимлар ажралиб туради. Томонлар шу йил қишда олиб сотиш билан шуғулланаётган “BYD Uzbekistan Factory” компаниясини ташкил этишган эди. Ўтган ҳафтада эса EXEED автомобиллари ишлаб чиқарувчи завод очилиши эълон қилинганди. Олдиндан анонс қилинмаган ҳужжатлардан “Ўзбекистон миллий банки” АЖ билан “Хитой Эксим банки” ва “Хитой тараққиёт давлат банки” ўртасидаги кредит линияларини жалб қилиш битимлари ҳам эътиборни тортади. Хитой банклари Ўзбекистоннинг энг йирик кредиторларидан ҳисобланишади. Янги қарзлар имзоланган бошқа битимларни молиялаштириш, айтайлик “Ўзбекистон темир йўллари” АЖ локомотивлари паркини янгилаш ва модернизация, электр узатиш линиялари ва нимстанцияларини қуриш лойиҳасини молиялаштириш билан боғлиқ бўлиши мумкин. Чунки қоида тариқасида Хитой банкларининг кредитлари асосан хитой иштирокидаги лойиҳаларни молиялаштиршггагина йўналтирилади. Ҳужжатлар орасида Ахборот ва оммавий коммуникациялар агентлиги билан Хитой Халқ Республикаси Давлат кенгаши Матбуот канцелярияси ўртасида оммавий ахборот воситалари соҳасида ҳамкорлик тўғрисидаги англашув меморандуми ҳам кўзга дарҳол ташланади.