​Монополиянинг бузуқ башараси: ўзбекистонликларга тупуриб қўйилган, ҳаммаси Қозоғистон учун Монополлаштириш яширин миллий ғояга айланиб улгурган Ўзбекистонда автомобиль ишлаб чиқариш қисқаришда давом этмоқда. Ўтган йилнинг тегишли даври билан солиштирганда енгил автомобиль ишлаб чиқариш 10%дан зиёдга ёки 9834тага қисқариб кетган. Пандемиядан кейин, бир ярим йил давомида ярим ўтказгичлар монополлаштирилган бозорда автомобиль танқислиги учун арпа уни сингари бўлиб келган бўлса, 2023 йилда янги баҳоналар ўйлаб топилгани йўқ. Маълумот учун, охирги олти ойда ярим ўтказгич ва транзисторлар 30-50%га, ҳаттоки каррасига арзонлашиб кетган. Айтиш керакки, ишлаб чиқариш кескин қисқаргани билан Uzauto motors ўзининг севимли иши ўзбекистонликларни жазолаш ва экспортга автомобиль етказишни бир дақиқа ҳам эсдан чиқармаган. Масалан, январь-апрель ойларида 27 739 та Cobalt ишлаб чиқарилган бўлса, шу даврда Қозоғистонда 10 627та Cobalt сотилган. Ишлаб чиқариш тўхтатилган деб эълон қилинган эсада, тўққиз қайтган қасамхўрлардек, 1985 дона Nexia-3 ишлаб чиқарилган, лекин Қозоғистонда 2 728та Nexia-3 сотилган. Яъни ўтган йили ишлаб чиқарилиб, эҳтимолки, яширин омборларда тузлаб қўйилган Nexia-3лар ҳам Қозоғистонга кетган. Цинизмнинг олий чўққиси шуки, ўзбекистонликларга Nexia-3 учун контрактация ўтган йили сентябрда, Cobalt учун эса декабрда тўхтатилган. Бир дона ҳам Nexia-3 ва Cobalt ишлаб чиқарилмаган қаҳратон январда Қозоғистонга эҳтимолки, тузлаб қўйилган омборлардан етказилган уч мингдан зиёд шу русумдаги автомобиллар сотилган. Қойилмисиз? Uzauto motors янги дейилган даврнинг 7- йилига келган ўтган ёмон замонда ўзбекистонликларга нисбатан қўллаб келинган энг расво, энг жирканч ва энг ярамас восита ва усулларини қўллашга ўтди. Яъни ўзбек автопромида ҳамма тош отишга ўтган ўша эски замоннинг бузуқ қоидалари, ҳаттоки схемаларигача ва менежментигача тўлиқ тикланди. Қозоғистонда январда, февралда, мартда ва апрелда автомобиллар сотувига қаранг, танлов ва рақобат кенглигига эътибор қаратинг. Шуларнинг ҳаммасига ўзбекистонликлар ҳам ҳақли аслида, лекин ўта тор ва юқори даражада коррупциялашган манфаатлар учун бутун бошли халқ бошқа муҳим танловлардан маҳрум қилингани сингари автомобиль танловидан ҳам маҳрум этилган.