Аҳволи танг Россия бюджет маълумотларини қисман бўлсада очиқламоқда Жуда оғир вазиятда ва бюджет мувозанатининг издан чиқиши юз берган бўлсада, Россия иқтисодий блоки ахборотларни қисман бўлсада очиқлашда давом этмоқда. Демак, Январь-май ойларида Россия федерал бюджети даромадлари 9,8 трлн.рублни ёки ўтган йилга нисбатан 19%га қисқаришни намоён этган. Айниқса, нефть ва газ билан боғлиқ даромадлар жудаям кескин, 2 баробарига қисқарган. Харажатлар эса, бу асосан Украинага босқин давом этаётгани билан боғлиқ, 26,5%га ошган ва 13,2 трлн.рублни ташкил этган. 5 ойлик бюджет дефицити 3,4 трлн.рублдан кўпроқ. Бу тасдиқланган йиллик дефицитдан 500 млрд.рублдан кўпроқ. Ҳозирча Россия Молия вазирлиги дефицитни суверен фонди ФНБ (бу бизнинг ФРРУ сингари, фақат темир терсак эмас, ликвидлироқ) ҳисобидан ёпмоқда, рублнинг секин аста қадрсизлаётгани ҳам фарқларни қоплашга омил бўлмоқда. Эътиборлиси, уруш шароитида ҳам ФНБ қолдиқлари ва маблағлар ҳаракати тўғрисидаги ахборотлар ёпиб қўйилгани йўқ. Эслатиб ўтамиз, Ўзбекистонда 2023 йил бошидан буён бюджет, унинг таркиби, ижроси, дефицити тўғрисидаги маълумотларни эълон қилиш ва бу ҳақида ҳисобот бериш тўхтатиб қўйилган. Консолидациялашган бюджетнинг бир қисми бўлган ФРРУ чораклик ҳисоботлари ҳам очиқланмай қўйган (аввалги чораклардаги маълумотлар ўчириб юборилган).