Негизини автокредитлар ташкил этадиган истеъмол кредитлари ажратиш тезлашган Май ойида банкларнинг кредит қўйилмалари 7,1 трлн.сўмга ўсиб, 420,5 трлн.сўмга етган. Ой давомидаги ўсишнинг деярли 90 фоизини чакана кредитлар ташкил этган. Бунда энг катта улуш негизини автокредитлар ташкил этувчи истеъмол кредитлари ҳисобига тўғри келади. Истеъмол кредитлари қолдиғи 3,1 трлн.сўмга ёки апрелда нисбатан 1,0 трлн.сўмга тезроқ кўпайган. Банклар автокредитлар бўйича риск табақаси қаттиқлаштирилишидан олдин автокредитлар ажратишни фаоллаштиришда давом этишмоқда. Май ойида корпоратив кредитлар қолдиғи 927 млрд.сўмга кўпайган. Солиштириш учун оилавий тадбиркорлик учун ажратилган кредитлар қолдиғи 940 млрд.сўмга ошган. Яъни, амалда банкларда корпоратив кредитлаш тўхтаб қолган ва у асосан кредитларни қайта молиялаш шаклига кирган. Муаммоли кредитлар 128 млрд.сўмга камайган. 1 июнь ҳолатига NPL қолдиғи 14,6 трлн.сўмни ташкил этмоқда.