"Қишлоқ қурилиш банк" иккинчи "Микрокредитбанк" бўладими? “Қишлоқ қурилиш банк”и кичик бизнесни қўллаб-қувватлаш билан шуғулланадиган “Бизнесни ривожлантириш банки”га айлантирилиши қатор мулоҳазаларга ундайди. Биринчидан, аввал ҳам кичик бизнесни давлат томонидан алоҳида имтиёзли ва манзилли молиялаштириш учун ихтисослашган банклар ташкил этилган. 1993 йилда «Тадбиркор» акциядорлик тижорат банки, кейин шу банк негизида қайта ташкил этилган Микрокредитбанк олдига айнан шу каби вазифалар қўйилганди. Банк соҳасига алоқадор ҳар бир мутахассис Микрокредитбанкнинг бундай ихтисослашуви қандай оқибатлар яратгани ва яратаётганини жуда яхши билади. Молиявий натижаларидан тортиб, активлари сифатигача, бизнес жараёнларидан тортиб мижоз билан муносабатларгача. Ўзи кичик бизнесни алоҳида, имтиёзли, махсус молиялаштириш билан шуғулланадиган давлат банки орқали қўллаб-қувватлаш практикаси муваффақият келтирган мисолларни топиш жуда қийин. Иккинчидан, “Бизнесни ривожлантириш банки”га айланган Қишлоқ қурилиш банки кичик бизнесни молиялашга ихтисослашса, унда шу пайтгача профили бўйича формал равишда кичик бизнесни қўллаб-қувватлаб келаётган Микрокредитбанк нима билан шуғулланади? Учинчидан,  “Қишлоқ қурилиш банк”и хусусийлаштириладиган банклар рўйхатига киритилган эди. Муддатлар бир неча бор узайтирилганига қарамай, банкни хусусийлаштириш режасидан воз кечилгани йўқ ва бу тўғри вазифа. Чунки  “Қишлоқ қурилиш банк” сотса харидори чиқадиган банк, ҳеч бўлмаса номинал нархида ёки ундан пастроқ баҳода. Лекин Микрокредитбанкни сотиб бўлмайди. Банкнинг  “Бизнесни ривожлантириш банки”га айлантирилиши уни хусусийлаштиришдан воз кечганини англатадими? Ахир унинг трансформацияси, хусусийлаштиришга тайёрлашга ҳам озмунча вақт ва маблағ кетгани йўқ. Тўртинчидан, 2020 — 2025 йилларга мўлжалланган Ўзбекистон Республикасининг банк тизимини ислоҳ қилиш Стратегиясига кўра, тадбиркорликни ривожлантириш давлат мақсадли дастурлари доирасида кредитлашнинг 3 та банк — АТ Халқ банки, «Агробанк» АТБ ва «Микрокредитбанк» АТБда жамланиши аниқ кўрсатиб қўйилган.  “Бизнесни ривожлантириш банки" ташкил этишни илгари сурган ташаббускорлар Стратегиянинг муҳим қоидасини эсдан чиқариб қўйган бўлишлари мумкин эмас. Албатта, давлатнинг кичик бизнесга нисбатан сиёсати ва дастурлари банклар воситасида ҳам амалга оширилади. Лекин 10 фоизига тадбиркор, 45 фоизига “Бизнесни ривожлантириш банки”, қолган 45 фоизи учун давлат кўмагида ресурс йўналтириладиган лойиҳалар,  қарздорларнинг “Бизнесни ривожлантириш банки”га улушдор бўлиб кириши билан боғлиқ тажрибалар лойи шундай тажрибалар билан қорилган Микрокредитбанкда ўтказилгани мантиқлироқ ва мазмунлироқ кўринади. Стратегиялар, аввалги қарорларга мутаносиблик, молиялаштириш схемаларидаги иқтисодий самарадорлик масалаларини қўя турайлик, ҳали тирик банкни ўлдириш керак эмас. Айниқса, турли тажрибаларга доим тайёр бўлган, ўзига хос ва ўзига мос, номида банк калимаси ёзилган давлат агенти ихтиёримизда мавжуд бўлганида.