Сюрприз: Финтех компанияларга трансчегаравий халқаро транзит операциялари ўтказиш тақиқландими? “BRIO GROUP” МЧЖ (OSON) Газета нашрига берган маълумотига кўра, 5 сентябрдан бошлаб Финтех компанияларга трансчегаравий халқаро транзит операциялари ўтказиш тақиқланмоқда. Бу ҳақда ўнлаб финтехкомпанияларга Марказий банкдан юборилган хатда маълум қилинган. Бугун Марказий банкнинг тушдан кейинги хабарида, тўлов операцияларини амалга оширишда жиноий фаолиятдан олинган даромадларни легаллаштиришга ва терроризмни молиялаштиришга қарши курашиш тўғрисидаги қонунчилик ҳужжатларининг талабларини бузганлиги учун “BRIO GROUP” МЧЖ (OSON) тўлов ташкилотига нисбатан жарима санкцияси қўлланилгани очиқланганди. Лекин регулятор ахборотида трансчегаравий халқаро транзит операциялари ўтказиш тақиқланганлиги ҳақида ҳеч қандай маълумот берилмаган. "5 сентябрдан бошлаб биз ва бошқа тўлов ташкилотларини феълан барча халқаро сервислардан узилишга мажбурлашмоқда. Бизда дунё миқёсидаги йирик компаниялар билан бевосита алоқалар бор. Келиб чиқаяптики, биз барча келишувларни регуляторимиз бозорни ёпаётгани учун бир томонлама бекор қилишимиз керак...Моҳиятан, бизни шунга олиб келишмоқдаки, мазкур хизматларни, эҳтимол, фақат битта банкдан (!) сотиб олишимиз керак бўлади", дея қайд этган Brio Group раҳбари Фарҳод Маҳмудов. Маҳмудов бундан буёғига тўлов ташкилотлари трансчегаравий халқаро транзит операцияларини ўтказиши "бириктирилаётган" банк номини ошкор қилмаган.