Биз истеъмолчилар ютқаздик ва бунга аниқлик киритиб кетишга тўғри келади (1) Марказий банк ниҳоят бир ҳафта деганда, аввалига тўлов ташкилотининг оммавий ахборот воситалари орқали эътирозлари, кейин тижорат банкларининг ҳали расман очиқланмаган Марказий банк ҳаракатларини (1, 2, 3) қўллаб-қувватлашини овоза қилишларидан кейин баёнотини эълон қилди. Яна қайд этиб кетиш керакки, Марказий банк баёнотини очиқламасдан туриб Oson тўлов хизмати Марказий банк жарима санкциялари иши бўйича барча сўровларни қайтариб олиши ва жаримани тўлашини маълум қилиб улгурганди. Де-факто конфликт сўрилиб бўлди, регуляторнинг тоши оғир келди, жамоатчилик қўлловисиз ва эътиборисиз қолган, Ўзбекистонда "арбоб ҳар боб билан уришини", эҳтимолки кўзда тутмаган бозор иштирокчиси аввалдан аниқ бўлган мағлубиятини тан олди. Лекин бу ерда фақат регулятор манфаатлари ва тўлов бозори иштирокчисининг хоҳишлари билан жараён тугамайди. Чунки истеъмолчи сифатида биз ҳам бор. Якун шуки, Марказий банк трансчегаравий давлатлараро транзит операциялари бозорининг катта, банклар эгалламаган ва уларга қизиқ бўлмаган сегментини ўлдирди (худди 12 йил аввал бир нечта кредит уюшмасининг хатарли операцияларини деб бутун бошли кредит уюшмаларини тугатиб, тақиқлаб юборишгани сингари). Шу маънода бу прецедентда биз ютқаздик. Истеъмолчилар ютқазди.