Ўзбек энергетикасининг бугунги мақсади таннархни шиширишга ва пул ўзлаштиришга қаратилган Энергетика вазирлигининг маълум қилишича, 1 куб метр газнинг таннархи 1 890 сўм, 1 кВт.соат электр энергияси таннархи 970 сўм эмиш. Худди шу вазирлик 1 йил аввал 1 куб метр газнинг таннархини 1400 сўм, 1 кВт.соат электр энергияси таннархини 800 сўм деб эълон қилганди. Демак, шонли энергетикларимиз бир йил ичида газ таннархини 35%га, электр энергияси таннархини 21,25%га шиширишган. Албатта, газ ва электр таннархи билан боғлиқ ўтган йилги рақамларга ҳам, бу йилги рақамларга ҳам заррача ишонч йўқ. Чунки ўзбек энергетикасининг 2017 йилдан кейинги бутун маъно мазмуни энергетикада миллиардлаб доллар қийматдаги бюджет ва қарз маблағларини ўзлаштириш ва таннархни тинимсиз шишириш, пировардида мамлакат энергетикасини ва у орқали бутун ўзбек иқтисодиётини потенциал агрессор давлатга қарам қилиш устига қурилган (бу менинг шахсий фикрим, ҳеч кимга тиқиштирмоқчи эмасман). Ваҳоланки 3 йил аввал Давлат раҳбари энергетика соҳасидаги бозорга ўтишдан аввалги энг катта вазифаси деб таннархни камайтиришни белгилаган эди. Вазирликнинг ўзиям таннархни камайтириш стратегик йўналишлардан бири деб билган (ҳатто ички ҳужжатларда ва бизнес-режаларда ҳар йили таннархни 10 фоизгача камайтириш чора-тадбирлари белгилаб келинган). Реалликда бутун ҳаракатлар таннархни шишириш ва соҳага, айниқса олдиндан иқтисодий самарасизлиги аниқ бўлган, каррасига қимматлаштирилган лойиҳаларга тинимсиз, мисли кўрилмаган қарз ва бюджет маблағларини жалб қилиб келинган. Юқорида таннарх бўйича келтирилган рақамларга заррача ишонч йўқлиги ҳақида бежиз таъкидламадим. Биргина мисол. Агарда Энергетика вазирлигининг рақамлари тўғри бўлса, демак биз Қирғизистонга газни таннархидан паст сотаяпмиз, Афғонистонга электрни таннархидан паст нархда сотаяпмиз. Бу эса абсурд, ғирт аҳмоқгарчилик бўлган бўларди. Унда нега вазирлик ўзининг вертикал назоратидаги тизимда газ ва электр таннархини бунақа ошириб кўрсатмоқда. Фикримча, мақсад аниқ: тарифлар ошганидан кейин ҳам таннархни қопламаяпти деган важ-корсон билан самарасиз лойиҳаларни давом эттириш ва қора ўпқонга айланган тизимда пул ўзлаштиришни тўхтатмаслик. Чунки фақат шу йўл билан триллионлаб қийматдаги хатолар ва ўзлаштиришлар ювилиб, "списать қилиниб" кетаверади. Шу маънода 1 октябрдан кейин бизнес учун тарифларнинг оширилиши (бунинг заруриятини ҳамма соғлом ақл эгалари тушунади ва қўллаб-қувватлайди) фақат нархларнинг оширилиши бўлиб қолмаслиги учун соҳада ҳақиқий бозор ислоҳотларини ва таркибий ўзгартиришларни бошлаш керак. Ҳозирданоқ.