Рақобат қўмитаси Yandex.Go (Taxi)'ни монополист деб эълон қиладими? Бир неча ойлик сукутдан кейин антимонополия органимиз Yandex.Go'нинг устун мавқега эгалиги масаласига қайтмоқда. Қўмитага кўра, тенг рақобатни таъминлаш нуқтаи назаридан хўжалик юритувчи субъектларнинг Ўзбекистон ҳудудида солиқ резиденти сифатида рўйхатдан ўтмаганлиги, уларнинг бозордаги устун мавқеини аниқлашга таъсир этмайди. 7 ой аввал эълон қилинган баёнотда, Яндекс Ўзбекистонда юридик шахс ташкил этмагани уларнинг фаолиятини монополияга қарши тартибга солишда маълум қийинчиликларни туғдиришига ишора қилинганди. Рақобат қўмитасининг ваколат ва имкониятларини ўтган ҳафтада кучга кирган “Рақобат тўғрисида”ги Қонун анча кенгайтирди. Маълум қилинишича, рақамли платформа бўлган агрегаторлар томонидан кўрсатилаётган хизматлар бозорининг таҳлилий ишлари якунланган ва яқин кунларда унинг натижалари эълон қилинади. Yandex.Go (Taxi)'нинг нафақат Ўзбекистонда солиқ тўлаши, балки барча белгиларига кўра устун мавқега эга деб топилиши, яъни монополистлар рўйхатига киритилиши жуда муҳим қадам ҳисобланади.