​Расман 100 фоиз рўйхат орқали тасдиқлаш 50 фоиз иллюзия яратишдан яхшироқ 2024 йилги сайловлардан бошлаб парламентнинг 50 фоиз таркибини партиявий рўйхат асосида шакллантириш бошланадиган кўринади. Албатта, сиёсий фикрлар, ғоялар, позициялар концентрациялашмаган, уларнинг бўлиниши, фарқланиши ижтимоий онгда англанмаган, шиорлари ва лидерларигача формал ва маъмурий тарзда тепадан тақсимланадиган, фуқаролар Каримов шахсан ўзи ясаб-яратган бу партияларнинг номи ва мафкурасини эмас, бармоқ билан санарли даражада кам сонли бўлса-да, шахсларни сиёсатчи деб биладиган жамият учун мазкур қадам парадоксдек кўринади. Рост-да, парламент ва кенгашларда мустақил номзодлар иштирокига рухсат берилишини сўраётган ва интиқиб кутаётганда 50 фоиз таркиб пропорционал сайлов тизими асосида, яъни сиёсий партияларга берилган овозлар бўйича ягона сайлов округидан сайланиши бу аслида формал "қаттиқлашиш". Яъни энди қанақадир назорат ва эътибордан четда қолган округда дастлабки фильтрдан ўтган, лекин кутилмаган номзоднинг сайланиб қолиши эҳтимоли нолга янада яқинлашади. Парламентга халқни бир қадам ҳам яқинлаштирмасликнинг амалдаги йўриғи "хардкорлашади". Лекин бу етарли эмас. Бўлса, борича бўлсин. 100 фоизлик расман рўйхатга ўтишимиз керак. Чунки иллюзиялар жамият иллюзияларга ишонаётган вақтдагина ишлайди.