Ҳар декабрда шу бўлар такрор: парламент илма-тешик бўлиб кетган 2023 йил бюджетини тасдиқлаб берадими? Айтишларича, шу ҳафта якунида ёки келаси ҳафта бошида ҳукумат 2023 йил бюджетига ўзгартириш ва қўшимчаларни парламентга киритади. Йил тугашига 10-15 кун қолганида жорий йилнинг бюджетига ўзгартиришларни маъқуллатиб олиш Ўзбекистонда бузуқ анъанага айланиб бўлган. Ахир барибир парламент ҳукуматга "йўқ" дея олмайдику ва буни ҳамма, магазинчи Ғайбулла ҳам билади. Нормал дунёда ҳукумат бюджетда кўрсатилмаган, параметрлардан ортиқча харажат қилмоқчи бўлса аввал парламентда буни исботлайди, ҳимоя қилади, тортишувлар ва компромисслар билан маъқуллатади, кейингина харажат қилади. Ўзбекистонда эса ҳукумат бюджетда акс этмаган хоҳлаганча харажатни исталганча амалга ошираверади. Йил бўйи, бюджет илма тешик бўлиб, ямалиб, яна илма тешик бўлишгаям улгуради. Ўнлаб триллион сўм ўнгга, чапга чайилади. Оғзаки топшириқлар, ёпиқ қарорлар, севимли олигархларнинг лойиҳаларининг ҳеч бирига йўқ дейилмайди. Йил тугашига 2 ҳафта қолганида эса, аллақачон ишлатиб бўлинган харажатларни парламентдан тасдиқлатиб олишади. Бунинг учун дастёр Қонунчилик палатасига 3 соат, мудраб ётган оқсоқол ва кайвони сенаторларимизга 2 соат вақт ажратиш кифоя бўлади. Биронта депутат, биронта сенатор тўхтанглар, йил бўйича Бюджет кодексини буздинглар, ўзимиз белгилаб берган бюджет қонунига тупуриб қўйиб харажат қипсан, бошқа бунақаси кетмайди, демаган, бундан кейин ҳам демаса керак. Ё бу сафар кесакдан ўт чиқиб мўъжиза рўй берармикан?