2024 йил бюджетига ўзгартиришлар киритиладими? Пандемиядан кейинги даврда йил тугашига 10-15 кун қолганида, баъзида эса 3 кун қолганида жорий йилнинг бюджетига ўзгартиришларни маъқуллатиб олиш Ўзбекистонда бузуқ анъанага айланиб қолган. Нормал дунёда ҳукумат бюджетда кўрсатилмаган, параметрлардан ортиқча харажат қилмоқчи бўлса аввал парламентда буни исботлайди, ҳимоя қилади, тортишувлар ва компромисслар билан маъқуллатади, кейингина харажат қилади. Ҳозирги Ўзбекистонда эса тескариси. Харажатлар бемалол қилиб олинади, кейин йўқ дея олмайдиган дастёр параламент аллақачон тақсимланиб, ўзлаштирилиб, ҳазм қилиниб бўлинган харажатларни бюджетга киритиб, 3 соатда тасдиқлаб беради. Бу амалиётга, сайлов йилида ҳеч бўлмаса чек қўйилса керак, деган умид йўқ эмас. Гарчи сайлов паловда қатнашаётганлардан ҳеч бири ҳукуматнинг бюджетга нисбатан бундай деструктив муносабатини сўроққа олмаётган бўлса ҳам. Мисол учун энергетика учун бюджетда акс эттирилган субсидиялар аллақачон ўзлаштирилиб, тугатилиб, бюджетнинг қўшимча даромадларини ҳам емиришга ўтган. Каррасига ортаётган газ импорти мамлакат бюджетини шартли ўлпон сифатида шимолга қараб оқизмоқда, қиммат олтин ҳисобига бюджетда қўшимча даромадларнинг пайдо бўлгани таннарх шиширувчи шонли энергетикларнинг тўймас иштаҳаларини яна қитиқлашни бошлаган. Бу 2024 йилнинг тасдиқланган бюджети ўз актуаллигини йўқотди, унга реаликлардан келиб чиқиб ўзгартириш ва қўшимчалар киритиш керак дегани. Ўзбекистон халқи ва халқнинг формал бўлса ҳам вакиллиги ҳисобланган параламент янги ёки ошган харажатларни аввал тасдиқлаши керак. Ҳеч бўлмаса, олдиндан хабардор бўлиши лозим.