​Совурилган харажатларнинг яширинча тасдиғи: Парламент ва вазирлик нимадан уялади? Қонунчилик палатаси 2025 йил бюджети учун харажатларнинг 41 трлн.сўмга ошишини трансляция ўтказмасдан, бу ҳақда расмий хабар ҳам бермасдан, яъни ОАВ ва жамоатчиликдан яширинча тасдиқлаб берган. Иқтисодиёт ва молия вазирлиги Парламент депутатлари олдида бюджет харажатларининг кескин ошиб кетганини қандай важлар билан оқлагани, аллақачон совуриб бўлинган харажатларни тасдиқлаб бериш учун қандай оқловларни келтирганини билмаймиз (бюджет харажатлари 41 трлн.га ошиб кетгани жамоатчиликка фақат Сенатдаги муҳокамалар пайтида маълум бўлган). Сенатдаги муҳокамаларда ҳам қўшимча харжатларнинг 26 трлн сўмга тенг йўналишлари саналган. Қолган 15 трлн.сўм қандай тақсимлангани аниқлаштирилмаган. Баҳодир Абдуллаев бюджетнинг нафақат дефицити, балки харажатларининг ўзгаришига нисбатан ҳам чекловчи қоидалар жорий этилиши мақсадга мувофиқлиги ҳақида ёзмоқда. Ўзи бюджет тақчиллигига нисбатан ҳам фискал қоидаларни ишлаб чиқиш ҳақида бир неча йилдан буён гапирилади. Лекин бу ерда гап даромадларда ҳам, тийиқсиз ва интизомсиз ўзбек чиновниги бебилиска даромад тушиб турса (тилла, мис қимматлаб турса), харажатни ўйлаб топа олади, керак бўлса, ўғри олигархия билан шерик бўлиб осмондан олиб шиширилган лойиҳа ясайди. Шундай экан, нафақат фискал қоидаларни такомиллаштириш (бу ҳақда Фискал стратегияда ҳам ёзилган) бюджетнинг ортиқча даромадларини стерилизация қилиш ҳақида ҳам ўйлашимиз керак бўлади. Дарвоқе, йил тугашига бир неча кун қолганида белгиланганидан ортиқча ва аллақачон совурилган харажатларни дастёр парламентга тақдиқлатиш янгилик эмас, лекин яширинча тасдиқлатиб олиш бу янги туб. Ҳатто ўта оғир келган 2023 йилда ҳам бюджет жараёни бунақа шарманда деградацияга учрамаганди. Хўп, энди нима бўлади? Иқтисодиёт ва молия вазирлиги узр сўраб, хатоларини такрорламасликка ваъда берадими? Бюджет совуриш чемпионатининг ғолиблари жазо оладими? Ортиқча 41 трлн.совурганлар келаси йилга интизомлироқ бўлиб қоладими? Ёки ўзини ўзи оппозиция деб эълон қилган ХДП совуриб бўлинган бюджет тасдиқланадиган ёпиқ мажлисларда иштирок этишдан бош тортадими?