Хавотирли таклиф Ўтаётган ҳафтада Ўзбекистонда бўлган Лукашенконинг бизга берган бир ғаройиб таклифи, назаримда, эътиборсиз қолди. Ўзбекистон нима қилиши кераклигини гўёки "ўз номидан" бот бот такрорлашни хуш кўрадиган Лукашенко бу сафар Россиядан ғалла олиш кераклигини уқтиргандек бўлди. Хабарингиз бор, Ўзбекистон ўзи 8 млн.тоннагача ғалла етиштирган ҳолда, асосан қўшни Қозоғистондан буғдой ва ун импорт қилади. Яъни, ғаллага бўлган ички талабимиз етарлича диверсификация қилинган, ҳатто Афғонистонга экспортимиз ҳам бор. Мисол учун, охирги очиқ маълумотга кўра, 2022 йилнинг 10 ойида Қозоғистондан 579 млн.долларлик буғдой, 104 млн.долларлик ун импорт қилганмиз. Шундай кейин статагентлик озиқ-овқат импорти бўйича ҳисобот беришни тўхтатган. Маълумот учун айтиш керакки, Россия империяси ўлкамизни босиб олгандан кейин ва Совет ҳокимияти йилларида ҳам Россия марказидан буғдой келтириш масаласи мустамлакачилик сиёсатнинг асосий воситаларидан бўлган. Собиқ марказ ўлкадан арзон пахта олиш ва эвазига қиммат ғалла етказишни ҳеч қачон кун тартибидан туширмаган. Ўзбекистон мустақилликка эришгандан кейин, 1994 йилга келибгина бу бўйинтуруқ занжирдан қутулганмиз. Мамлакатимиз ўз эҳтиёжига етадиган ғалла етиштириш ва қолганини энг қулай, логистик арзон, дўст ва қардош Қозоғистондан импорт қилишнинг энг оптимал ечимини мана 30 йилдирки, учинчи тараф аралашувисиз қўллаб келмоқда. Шунинг учун, бутун дунёда 2021-22 йилларда, айниқса уруш бошлангач, сунъий равишда уюштирилган ғалла дефицитини ўзбекистонликлар сезганиям йўқ. Умид шуки, бундан кейинам шундай бўлади. Ёқилғи бозоримизни бериб қўйганимиз каби хатоликка ҳаёт-мамот масаласи бўлган ғалла бўйича йўл қўйилмайди. Қолганларнинг, керак бўлса ўзимизниям, хатоларимизни кўриб тўғри фикр қилишда давом этишимиз керак. Ҳар қандай товарни, хусусан ғалланиям таъсир аслаҳаси ўлароқ кўрадиган Россияга боғлиқ бўлиб қолган Грузияда қимматлашаётган дон ва ун тўғрисида Анҳор.ўз яхши материал жойлаштирипти.