Марказий банк биржадаги валюта савдоси бўйича маълумотларни чеканкалашни бошлаган 2023 йил якунлари бўйича Марказий банкнинг Статистик бюллетенида айрим маълумотлар чеканкаланган ҳолда тақдим этилган. Хусусан, Валюта биржасидаги "Тижорат банклари томонидан сотиб олинган ва сотилган чет эл валюталари" тўғрисидаги маълумот ўрнига "Тижорат банкларининг валюта савдоси айланмаси" тақдим этилган. Бириктирилган суратлардан жадваллардаги фарқни яққол англашингиз мумкин. 2023 йилнинг 11 ойида биржада Тижорат банклари томонидан сотиб олинган ва сотилган валюта ҳажми фарқи 11,4 млрд.доллардан ошиб кетган эди. Яъни, банклар ўзи ва мижозлари учун борган сари биржадан кўпроқ валюта сотиб олмоқда, биржага камроқ валюта сотмоқда. Ошаётган фарқ юки Марказий банк, шунингдек, Иқтисодиёт ва молия вазирлиги, ФРРУ зиммасига тушади. Чеканкалашдан мақсад қандай "эзгу" бўлганидан қатъий назар, ёмонлашаётган картина устига парда тортиб туриш ҳеч қачон ечим бўлмаганини ёмон тарихимиз кўп марта кўрсатганини эслатиб кетиш жоиз.