​2023 йилда бизнеснинг валютадаги депозитлари 2 млрд.долларга қисқарган 2023 йил давомида юридик шахсларнинг Ўзбекистон банкларига жойлаган валютадаги депозитлари қолдиғи йил давомида 36%га, 5,5 млрд.доллардан 3,5 млрд.долларгача қисқарган. Валютадаги депозитларнинг қисқариши бутун йил давомида тўхтамаган, лекин энг катта камайиш жудаям оғир келган 2023 йилнинг биринчи чорагига тўғри келади (-1,1 млрд.доллар). Таъкидлаш жоизки, бизнеснинг валютадаги депозитлари қолдиғи 2019 йилдан буён фақат ўсиш тенденциясига эга бўлиб келаётганди. Валютадаги депозитлар қолдиғининг бироз қисқариши охирги марта 2018 йилда, юқори инвестицион ва импорт фаоллиги фонида кузатилган эди. 2023 йилдаги қисқаришнинг қайси омиллар ҳисобига шаклланганини алоҳида таҳлил ва ўрганишларсиз айтиш қийин.