9,7 млрд.сўм солиқ яхши, лекин жуда кам Солиқ қўмитаси такси агрегаторлари охирги 3 ойда 9,7 млрд.сўм солиқ тўлаганини, йўловчи хизматлари бозорини оқартириш давом этаётганини маълум қилмоқда. Йўқдан кўра юпанчиқ албатта, лекин бозорнинг кўламига нисбатан бу жуда кам. Мисқол мисоли. Бу борада хурсанд қиладигани ўзини ўзи банд қилган ҳайдовчилар сони ўсишда давом этмоқда ва уч ойда 42%га ўсиб 113,5 мингга етган. Солиқчиларимиз тўланган 9,7 млрд.сўмнинг таркибини очиқлашмаган. Катта эҳтимол, бу фақат ҚҚС холос. Лекин ҳатто шу ҚҚСни ҳам айрим бозорни ўзиники деб ҳисобловчи монополист агрегатор ҳамкорлар ва мижозлар зиммасига юклаб юборган. Бошқача айтганда монополист агрегаторнинг маржаси ошган бўлса ошдики, камайгани йўқ. Антимонополия устун мавқега эга деб топгани билан Yandex Go тарифлари мезонлари ва алгоритмларини ўз назоратига ололмаган. Февралдаги энергетик кризис вақтида ошган нархлар ошганича қолди. Ё Yandex шунчалик кучли, ё Антимонополия органимиз шунчалик кучсиз. Yandex Go вилоят марказларида фақат нақд пулга хизмат кўрсатаётганига ҳам кўз юмишда давом этилмоқда. Тўланган солиқлар фақат ҚҚС бўлиши керак, деб бекорга гумон қилмадик. айрим агрегаторлар лазейкалардан фойдаланаётганлари ҳам сир эмас. Тўланган солиқ суммасида фойда солиғи ёки дивиденд солиғи борми? Ўзи такси агрегаторни IT компания деб ҳисобласа бўладими? Яна бир гап. Кўпчилик эътибор бермаётган бўлиши ҳам мумкин, агрегаторларнинг фискал чеклари "кэшбек берилмайди" тоифасига ўтказиб қўйилган. Қўмитанинг хулосаларига қўшилса бўлади, бу йўналишда ечимини кутаётган ва охирига етказилиши лозим бўлган масалалар ҳали кўп.