Ўзбекнефтегазнинг гази 600 сўм, Ўзбекистон газ конларини эгаллаб олган олигарх ва "инвестор"ларда нарх қандай? "Ўзбекнефтгаз" АЖ ва "Шўртан газ-кимё мажмуаси" МЧЖ томонидан "UzGasTrade" АЖга етказиб бериладиган табиий газ нархи 600 минг сўм/ минг куб метрга ўзгартирилишини эълон қилмоқда. Янги нархларнинг қачондан кучга кириши номаълум. Аввалроқ, компаниянинг ўзи газнинг кубаси 340 сўмдан сотилганини очиқлаганди (феълан 2022 йилга тааллуқли даврда). Ўзбекистонда газ нархи шаклланиши билан асосий муаммолардан бири ношаффофлиги, транспарент эмаслиги ва бюджетни ўзлаштиришга мўлжалланган адолатсиз асосларга қурилгани билан боғлиқ. Ўзбекнефтегаз газ нархини таннархидан арзон сотиб келган бир шароитда илгари ўзи Ўзбекнефтгазга тааллуқли бўлган газ конларини эгаллаб олган олигарх ва "инвесторлар" газни давлатга каррасига қиммат сотиб келадилар. Бу муаммога 2022 йилда, ўша вақтдаги депутат бўлган Кушербаев эътибор қаратганди. Шу билан масала ёпди ёпди бўлиб кетган. Қанақадир Epsilon ва Saneg'ларга Ўзбекнефтегазнинг газ конлари ўтиб қолгани барибир бир кун тафтиш қилинади, ўрганилади, очиқланади. Лекин ҳозир айни дамда, нима учун газ қазиб олувчилардан газ сотиб олиниши нархлари каррасига фарқланиши ва нима учун бу фарқни Ўзбекистон бюджети, яъни солиқ тўловчилари тўлаши кераклиги ҳақидаги савол бўлиши керак. Маълумот учун ягона газ сотиб олувчи UzGasTrade'нинг 2023 йил 1 чорак якуни бўйича йиғилган зарари 6,3 трлн.сўмдан ошиб кетган. Кейин ҳисоботлар очиқланиши бутунлай тўхтатилган. Газни 340 сўмдан олиб 1500 сўмдан сотаётган ягона операторда триллионлаб зарар жамғарилиши мумкин эмас. Бундай ҳолат фақат айрим олигарх ва "инвестор"лар эгаллаб олган конлардан олинаётган ўзимизнинг газ 2000 сўм ва ундан қиммат нархда сотиб олингандагина шаклланади. Маълумот учун, газнинг номутаносиб нархлари яратаётган тешикларни ёпиш учун 2024 йилда 18.8 трлн.сўм субсидия ажратиш мўлжалланган. Бу онгли равишда тешилган тешиклардан ва бюджет субсидияларидан кимлар манфаатдор бўлаётганини энди ўзингиз тасаввур этаверинг. Энди савол: Таннархга асосланган тарифларга ўтишни режалаштираётган энергетиклар базавий таннарх сифатида Ўзбекнефтегаз таннархини оладими ё 2000 сўмгача шиширилган олигарх ва "инвестор"ларнинг таннархини?