Имтиёзлар эмас, тенг имкониятлар учун интилиш керак Президентнинг ҳар йили тадбиркорлар билан очиқ мулоқот ўтказиши анъанага айланди. Айни пайтда ҳам Қорақалпоғистонда ўтадиган шундай учрашувга тайёргарлик кўрилмоқда. Очиқ мулоқотга тайёргарлик доирасида тадбиркорларнинг мурожаатларини қабул қилиш ва таҳлил этиш бўйича Республика штаби ўз фаолиятини бошлади. Бизнес эгалари ўзлари дуч келаётган муаммолар ва таклифларни 24/7 режимида 1094 қисқа рақами орқали йўллаши мумкин. Ўтган йиллардаги мулоқотлар сарҳисоб қилинса, улардан эришилган энг катта натижалардан бири тадбиркорнинг ўзига бўлган ишончининг мустаҳкамланиши бўлганини кўриш мумкин. Улар ўз мақсад ва режаларини, таклиф ва танқидларини дадил айта бошлашди. Шунингдек, Давлат раҳбари ва тадбиркорлар ўртасидаги мулоқотлардан сўнг тадбиркорлик фаолиятига асоссиз аралашувларга барҳам бериш, тадбиркорлар учун имтиёзли кредитлар ва бошқа кўринишдаги енгилликларни тақдим этиш бўйича катта ишлар қилинди. Айни кунларда ҳам Президент билан очиқ мулоқотга тайёргарлик доирасида тадбиркорларнинг таклиф ва мурожаатлари йиғилмоқда. Аммо, шунга қарамай, ҳамон бир тенденция давом этмоқдаки, айрим тадбиркорлар алоҳида солиқ имтиёзларини талаб қилишдан тўхтамаяпти. Шуни тушуниш керак: чинакам ривожланиш учун носоғлом имтиёзлар эмас, ҳамма учун тенг бўлган имкониятлар зарур. Мавжуд қонун-қоидалар айнан шуни қўллаб-қувватлайди. Имтиёзларни эмас, ана шу қонунлар юз фоиз ишлашини талаб қилиш зарур. Шундагина барча баравар ривожланади, барча ютади.