​Марказий банк ҳам уй-жой бозори совий бошлаганини қайд этмоқда Кўчмас мулк бозорида февралдан кейин бошланган совуш ва пасайиш жараёни бирин-кетин турли шарҳларда акс эта бошламоқда. Бу борада Марказий банкнинг таҳлил ва хулосалари фаол бозор иштирокчилари ва истеъмолчилар учун қарор қабул қилишда алоҳида эътибор ва аҳамиятга эга. Демак: 2- чоракда олди-сотди бўйича 80,1 минг шартнома тузилган (биринчи чоракда 80,2 минг, ўтган йилнинг шу даврида 90,8 минг). Охирги 2 йилда уй-жой бозори қаттиқ қизиб кетган Тошкент шаҳри (-8%), Бухоро (-10%), Тошкент (-12%) ва Навоий (-26%) вилоятларида энг катта қисқариш қайд этилган. Талаб даражаси уй хўжаликлари даромадларининг мақбуллашуви, ипотека кредитлари ўсиш суръатининг секинлашиши, базавий инфляцион жараёнлар ва алмашув курсининг нисбатан барқарорлашуви шароитида мувозанатлашгани кўрсатилган. Бизнингча, даромадларнинг мақбуллашуви уларнинг ўсиши секинлашгани ёки нисбий тўхтаганини англатади. Марказий банк бозордан спекулянтлар кетаётганини эътибордан четда қолдирмаган. Регуляторга кўра, спекулятив талабнинг камайиши бозорнинг тўғриланишига қўшимча омил бўлиб хизмат қилади. Регуляторнинг тилида тўғирланиш манфий ўсиш деганини закий ўқувчига тушунтириш керак бўлмаса керак. Турар-жой харид қилиш ва уни ижарага бериш нархларининг ўсиш суръати ўртасидаги тафовут кенгайишда давом этиб, келгусида бу талабнинг узоқ муддатли ижарага ўтиши туфайли мулк қийматининг ўсишини мувозанатлаштириши мумкин. Бу одамлар тилига ўгирганда, ижара арзонлаётган шароитда мулк қийматининг ўсиши узоқ давом этмайди, секинлашади, тўхтайди ёки арзонлайди дегани. Регулятор шарҳида, бу ҳақда очиқ маълумотлар берила бошлагандан бери биринчи марта Тошкент шаҳрида ер нархи арзонлагани кўрсатилган. Унга кўра, июль бошига пойтахтда 1 сотих ернинг ўртача нархи 342 млн.сўмгача тушган (йил бошида 362 млн.сўм, апрелда 364 млн сўм эди).