Энди болаларга ҳам ҳимоя ордери берилади Сенатнинг 55-ялпи мажлисида “Болаларни зўравонликнинг барча шаклларидан ҳимоя қилиш тўғрисида”ги қонун маъқулланди. Унга кўра, болаларни зўравонликнинг барча шаклларидан ҳимоя қилиш бўйича муносабатлар ҳуқуқий жиҳатдан тартибга солинмоқда. Зўравонликдан жабрланган болага ўзининг қонуний вакили орқали тегишли давлат органлари ёки судга ариза билан мурожаат қилиши, бепул ҳуқуқий, иқтисодий, ижтимоий, психологик, тиббий ва бошқа турдаги ёрдамлардан фойдаланиши мумкинлиги белгиланмоқда. Энг асосийси, ушбу қонун билан илк бор янги институт – зўравонликдан жабрланган болаларга ҳимоя ордери бериш тартиби йўлга қўйилмоқда. Сўнгги пайтлардаги жараёнлар, жамиятда болаларга нисбатан тазйиқ, жисмоний, руҳий, жинсий зўравонлик ҳолатларининг авж олгани уларнинг ҳимоясига қаратилган қонунни қабул қилишни тақазо этаётганди. Зўравонлик болаларни руҳан мажруҳ қилиб, бутун умрга иродасини синдиради. Иродасиз улғайган болалар билан эса биз орзу қилган келажакни қуриб бўлмайди. Шу боис, уларни зўравонликнинг ҳар қандай шаклидан қатъий ҳимоя қилиш лозим.