8 йил аввал сотилган Миллий боғнинг "инвестори" яна ўзгармоқдами, Magic city қолган 41 йилда яна неча марта "сотилади"? Миллий боғнинг 20,79 гектар ер майдони 49 йил муддатга инвестор деб номланувчи Stargate Systems МЧЖга топширилганини эсласангиз керак. Кейинчалик, халққа тегишли Миллий боғ ўрнида пайдо бўлган Magic city бутафорияси кимга оид бўлгани ва компаниядаги улуш сотилгани 2024 йил бошида очиқ тан олинган эди (Ўзбекистонда давлат амалдорининг давлат хизматчиси бўлган вақтда, балки чекланмаган ваколатларидан фойдаланиб, катта бизнес билан машғул бўлгани ҳеч кимни ҳайрон қолдирмаган). Ростанам Magic city оператори "Stargate Systems" МЧЖнинг 99,9 фоиз улуши “TASHKENT AQUARIUM” МЧЖга сотилиши битими 2023 йил августда рўй берган. Энди, орадан яна бир ярим йил ўтиб, Рақобат қўмитаси томонидан “Xonadon taomlar” МЧЖнинг “Stargate Systems” МЧЖнинг 86,2 фоиз улушларини олиш бўйича талабномасига розилик берилган. Албатта, бу битим ортидан Magic city операторининг реал бенефициарлари яна ўзгармоқдами ёки йўқми, чуқурроқ ўрганишсиз бир нима дейиш қийин. Лекин аниқки, 8 йил аввал давлатдан Миллий боғнинг қарийб 21 гектарини олиб эгаллаган ва қатор мажбуриятлар олган инвестор энди бутунлай бошқа. Де юре ва де факто бошқа инвестор. Биринчи "инвестор" отнинг устида бўлиб улушини сотди, кетди, кейин иккинчиси келди, энди балки учинчиси. Табиийки, савол туғилади, давлат билан хусусий шериклик ёки бошқа мақомда битим тузилганда битим тузган субъектнинг бенефициари, акциядори, улушдори ўзгармаслиги ёки давлатнинг розилиги қоидаси бўлиши керак эмасми? Узоққа бормайлик, оддий кредит ёки қарз ажратилаётганда ҳам қарздорнинг таъсисчилари ёки акциядорларни кредиторнинг розилигисиз ўзгартирилмаслиги талаби темир қоида ҳисобланади. Ўзбекистонда "хусусийлаштириш"дан тортиб "давлат хусусий шериклик" дейилган янги кўзбўямачиликларгача триллионлаб қийматдаги активлар билан битим тузилаётганда эса давлатнинг, демакки, халқнинг оддий манфаатлари мантиғи унутиб қолдирилади. Ҳеч бўлмаганда, таъсисчи, акциядор ўзгариши билан аввалбошда келишилган имтиёз ва преференциялар бекор бўлиши ёки янги музокаралар асосида тўловлар кўриб чиқилиши тамойиллари амал қилмайди. Рақобат қўмитаси шунақа “қўшилиш ва сотилиш” битимларига рухсат беришда, вақти вақти билан шу ҳимоя мантиғини ёдга солиб турса бўларди.