​Нега Тошкентдан бой Алматида парковка 2500 сўм? 2024 йил якунлари билан Ўзбекистоннинг энг бой шаҳри Тошкентда жон бошига ялпи ҳудудий маҳсулот 91,4 млн.сўмни ёки 7,2 минг долларни ташкил этади. Қозоғистоннинг энг бой шаҳри Алматида жон бошига ялпи ҳудудий маҳсулот 12,9 млн.тенге ёки 27,5 минг долларни ташкил этади. Яъни қўшни қардошлар тахминан 3,8 баробар бойроқ. Йўқ жойдан бир қўлли парковка қироли ясалган Тошкентда парковка соатига зонасига қараб 5 минг сўмдан 12 минг сўмгача этиб белгиланган. Антиқа аукцион ғолиби бўлган хусусий оператор (ҳам парковка участкалари, ҳам дастур таъминоти шуларда) ва ҳокимият ўртасида Парковка тушумлари қандай тақсимланиши бўйича шартнома шартлари жамоатчиликка очиланмаган. Алматида парковка оператори "Алматы паркинг" давлат корхонаси ҳисобланади. Ҳа, қозоқ қардошлар ҳам аввалига парковка операторлигини "Алматы спецтехпаркинг сервис" деган хусусий операторга беришган. Лекин бу чўнтак компания бюджет буюртмаларини ўзлаштиргани учун жиноий иш очилган. Парковка операторлиги янги очилган давлат компанияси назоратига ўтказилган. Хуллас, айни дамда Алмати кўчаларида парковка нархи соатига 100 тенге ёки 2 500 сўмни ташкил этади. Фақат Кўкбозор ҳудудида (худди бизнинг Олой бозоримиз сингари) тарифлар соатига 150 тенге ёки 3 750 сўм этиб белгиланган. Бу ҳаммаси эмас. Пулли парковка фақат эрталабки 8:00дан кеч 19:00гача, лекин 19:00дан 8:00гача, яъни тунги ва тонги вақтларда бепул. Бу ҳали ҳаммаси эмас. Алматида пулли парковкадан тушган маблағлар шаҳарнинг "Ташаббусли бюджети" орқали, шунингдек парклар, ҳиёбонлар ва пиёда зоналари учун ишлатилади. Бошқача айтганда, машиналиклар машинасизларга етказган ноқулайлиги учун тўлайди. Энди савол: қандай қилиб Тошкентдан 3,8 карра бой Алматида парковка учун тўловлар 2 каррадан 3,2 каррагача арзон бўлиши мумкин?