Бизнесга ва истеъмолчига зарар келтирмайдиган тизим керак: Битта скальпелни рўйхатга олиш 10 минг доллар Тиббий клиникалар тармоғи раҳбари Нуриддин Нуриддинов табақалашиб, тижорийлашиб, жарга қулаётган ўзбек тиббиётида шу пайтгача балки истиҳола қилиб айтилмаган оғриқли муаммолардан бирини кўтарган. Тиббий асбоблар, жумладан, пинцет ва скалпелларни рўйхатдан ўтказиш БҲМнинг 84 баравари (31,5 млн сўм) ни ташкил этади, скальпелнинг ҳар битта қўшимча модификациясига эса яна БҲМнинг 23 бараварини (8,625 млн сўм) тўлаш талаб этилади (1:08:40 дан бошлаб кўринг). Нуриддин аканинг ёзғиришича, агар оддий скальпелнинг 10 та модификацияси бўлса, уни рўйхатдан ўтказиш тахминан 86 млн сўмга тушади. Умуман олганда, бир дона скальпел учун барча зарур ҳужжатларни расмийлаштириш тахминан $10 мингга тушиши мумкин (Ўзбекистондан 5 карра бой Қозоғистонда шу хизмат 500 доллар экан). Хўп, ким бунқа аждарҳо божларни ўрнатган деб ўйлайсиз? Ҳукумат қарорига кўра, тиббий ускуна ва техникаларни рўйхатга олиш Соғлиқни сақлаш вазирлиги томонидан тасдиқланадиган прейскурантга кўра амалга оширилади. Рўйхатга олиш билан Фармацевтика маҳсулотлари хавфсизлиги маркази давлат муассасаси шуғулланади. Вазирлик сайтида ҳам, Марказ сайтида ҳам рўйхатга олиш нархлари (прейскурант) жойлаштирилмаган. Нима учун скальпелга 10 минг доллар бож ўрнатдинг, деса, вазир ҳам, марказ раҳбари ҳам аниқ ва асосли жавоб бера олмаса керак. Бу сизга истеъмолчилар ва бизнесни қақшатаётган Техник тартибга солиш агентлиги ва унинг ўнг чўнтаги UzTest'ни эсга солмаяптими? Хўп, Техник тартибга солиш агентлигига қўл режимида бўлса ҳам чора топилаётгандир, лекин Соғлиқ сақлаш вазирлиги ва унинг марказига кимнинг тиши ўтади? Ўзи чиновниклар учун охурга айланмаган ва зараркунанда протекционизм кириб бормаган соҳа қолганми янги Ўзбекистонда? Ўзбек чиновниги қачондир иқтисодиётга, истеъмолчиларга, бизнесга зиён етказмай, рационал қарор қабул қила бошлайдими? Бунинг учун ҳадеб кўргазмали қўл ечим қилавермай, тизимли чора кўришнинг иложи борми?