Банк бозори ўйинчилар билан нисбатан тўйиниб бўлган Spot охирги 2 йилда Ўзбекистонда янги банклар очилмаётгани сабаблари билан қизиққан. Юлий Юсупов эски замонда банк лицензиялари йиллаб берилмагани ҳолатини эслаган (банк очиш энг тепадан рухсат олинадиган ғирт сиёсий иш эди, регулятор ҳал қиладиган тижорий ё бизнес масаласи эмас). Ҳозирги ҳолатда эса вазият ўзгачароқ. Бизнингча, биринчи ва энг асосий сабаб банк бозори ўйинчилар билан нисбатан тўйиниб бўлган (тўйинган бозорларда йиллаб янги банк очилмайди ва бу нормал ҳолат). Банк бизнеси, айниқса чакана сектор ташқи инвесторлар учун аввалгидек жозибадор эмас. Давлат банкларига бир неча йилдан бери харидор йўқ. Рентабеллик пасайишда давом этмоқда. Эгалланмаган секторлар деярли қолгани йўқ. Лицензия олганига 3 йилдан ошган янги банклар ҳам бозорга киришиб кета олишмаяпти. Буниям ҳамма кўриб турипти. Иккинчи сабаб, банк сектори технологик ўзгаришларга учрамоқда, банкларнинг кўп функцияларини финтех компаниялар ўзлаштирмоқда, қаердадир финтехга банк лицензияси керак бўлса, мавжуд банклар билан ҳамкорлик афзалроқ кўрилмоқда. Шундай бўлишига қарамай, яқин истиқболда бир нечта микромолия ташкилотлари микромолия банкларига айланишини кутса бўлади. Яна қўшилишлар юз бериши мумкин. Бу ҳақда Одилбек Исаков ҳам Lolazor'даги чиқишида ўз мулоҳазаларида гапириб ўтганди.