Антикоррупция яширинча ва ёпиқ хусусийлаштирилган Деҳқонобод калий заводи, Paynet, UNG Petro, Чиноз нефтни қайта ишлаш заводи каби ўнлаб активлар бўйича ҳам тақдимномалар киритадими? Коррупцияга қарши курашиш агентлиги Давлат активларини бошқариш агентлигига UzPost`даги давлат улушини хусусийлаштириш жараёнларида очиқлик ва шаффофликни таъминлаш юзасидан тақдимнома киритган. Ўзбекистон почтасининг акциядорлари Давактив ва Иқтисодиёт ва молия вазирлиги бир ҳафтадан бери сукут сақлаб турган пайтда, қонунчилик талабларини эслатиб тақдимнома киритилгани албатта хурсанд қилади. Ўйлаймизки, бу навбатдаги имитация эмас. Энди Антикоррупция агентлиги охирги йилларда "ўзбекча хусусийлаштириш оталари" қонунга зид равишда яширинча ёки ёпиқ ҳолда амалга оширган ўнлаб хусусийлаштириш кейслари бўйича ҳам ҳуқуқий ҳаракатларни бошлайди.