​Базавий инфляция пасайишда давом этмоқда, асосий ставкани пасайтиришга эртами? Марказий банк базавий инфляция, энергия нархлари таъсирисиз инфляция ва мавсумийликдан тозланган инфляция маълумотлари билан бўлишмоқда. Кўриниб туриптики, базавий инфляция май ойидан кейин пасайиш тенденциясига ўтган. Энергия нархлар таъсирисиз инфляция эса охирги 2 ойда пасая бошлаган. Мазкур тенденциялар яна давом этадими ё йўқми, аниқ айтиш қийин (куз ва қиш қандай келиши, урушнинг давом этиши ёки вақтинча тўхташи каби ички ва ташқи омиллар кўп). Май ойида кескин қимматлашган энергия товарлари (табиий газ, пропан, метан, қишлоқ жойларда электр энергияси) истеъмолининг чўнтакларга таъсири шимолий ҳудудларимизда иситиш бошланган октябрдан аниқроқ сезила бошлайди. Октябрь иссиқ келгани учун балки бу таъсир қолган ҳудудларда ноябрга кўчар. Шунингдек, 80 бензиндан воз кечиш ва присадкали 92+га ўтиш таъсири, метан таъминотидаги узилишлар бошланмагани учун ҳали сезилмаётган бўлиши мумкин. Сўмнинг сезиларли мустаҳкамланиши ва нефть нархининг кескин тушиши ҳам ёқилғи нархлари ўсишини тўхтата олаётгани йўқ. Асосий савдо ҳамкорларимиздан - қўшни Қозоғистонда (қатъий чоралар эълон қилинганига қарамай) ва яна уруш оқибатларининнг таъсиридаги узоқ шимолда инфляция янгитдан тўлқин олмоқда. Мана шундай шароитда, яна 3 кундан кейин Марказий банк асосий ставкани қайта кўриб чиқишига тўғри келади. Ставкани пасайтирилиши эҳтимоли йўқ эмас, лекин баҳоргача пул-кредит шароитларини ўзгаришсиз, қаттиқлигича қолдириш маъқул кўрилса, ҳеч ким эътироз билдирмаса керак.