Кўпчилик учун ҳурматли Жамшид Ходжаев ва унинг раҳбарлигидаги Қишлоқ хўжалиги вазирлиги Sulton Tex Group иши бўйича gazeta.uz учун махсус изоҳ матнини тайёрлапти. Агар Ўзбекистонда суд бўлса ва у росмана мустақил суд ҳокимияти бўлса эди, бу матнни жавобгар томоннинг тайёр иқрорномаси ва ўзига қарши гувоҳлиги, деб атаса бўлади. Не тонгки, бу иқрорнома Ўзбекистонда фермерларни, агар бу Жамшид Ходжаевнинг самимий принциплари бўлса, ниҳоят озод этиши ҳам мумкин. Жамшид Ходжаев ва унинг раҳбарлигидаги вазирлик очиқ текст билан ёзмоқда: Фермерларнинг ҳуқуқлари ва эркинликларини ва энг асосийси, танловини таъминлаш учун Sulton Tex Group кластерлик мақомидан маҳрум қилинмоқда. Ўртоқ Ходжаев, бу дегани демак Ўзбекистонда фермерлар кластерларга қарам ва муте, лекин аввалгидек ҳоким ва давлатга эмас, кластерларга. Ажойиб. Барака топинг, ҳақиқат ниҳоят тан олинаётгани учун. Лекин нега унда қолган 95та кластернинг фермерлари эркинликка чиқарилмаяпти? Кластерлар сиртмоғидан озод қилинмаяпти? Ё сизнинг принципларингиз "душманлар"га, ҳаққини талаб қилганларга ишлайди, "дўстлар"га келганда эса чекиниб турадими? Демак ҳукумат қарори билан Sulton Tex Groupга бириктириб қўйилган фермерлар "оқтанли", қолганлар "қора танли"-ми? Қолганларнинг ҳақлари ва эркинликларини, танловини кластерлар бузишда давом этса бўлаверади? Балки судда ютиш учун ва умуман фермерларни крепостнойликдан озод этиш учун битта линияни ушлаган маъқулдир? Шахсан мен сизга шу линияни маҳкам ушлашингизни ва принципларингизда охиригача туришингизда омад тилайман. Дарвоқе, сиз айтган 16 кишидан иборат комиссия, ҳатто бу комиссияга ёрдамчи сифатида жуда кучли бульдозер жалб қилинган бўлса ҳам ҳукумат қарорини четга суриб юбора олмайди. Буни ҳатто мустақил деб бўлмайдиган Ўзбекистон суди ҳам инкор эта олмайди.