2026 йилда Алоқабанк "хусусийлашадими" ё Туронбанк? Янгиланаётган Стратегия лойиҳасига кўра, 2030 йилга бориб, давлат ихтиёрида 4та банкни сақлаб қолиш режа қилинмоқда. Йиллар бўйича қаралса, келаси 2026 йилга 8та давлат банки қолиши ва давлат банкларининг банк тизими активларидаги улуши 65%ни ташкил этиши мўлжал қилингани, ҳозирда 9та давлат банки борлиги ҳисобга олинса, кичикроқ давлат банки ё Алоқабанк (ишоралар йўқ эмас) ё Туронбанк хусусийлашини кутса бўлади. Шунингдек, улушлар ўзгариши режасига қараганда, Саноатқурилишбанк ва Асакабанк "хусусийлаштирилишини" 2028 йил ва ундан кейинга кўрадиганга ўхшаймиз. 3 йил аввал "5 йилдан кейин Давлатга қарашли фақат битта банк бўлади” тарзидаги ушалмас орзулар ҳам айтилган, 2020 йилда тасдиқланган стратегия бўйича, 2025 йилга келиб, давлат улуши мавжуд бўлган банкларнинг банк тизими активларининг умумий ҳажмидаги улушини 40%га тушириш, давлат назоратини фақат учта банкда қолдириш (Миллий банк, Агробанк ва Микрокредитбанк) режалари эса умуман амалга ошмади. Лойиҳа бўйича 2030 йилгача 3 та тижорат банкида исломий молия хизматини йўлга қўйиш мўлжали ўзгаришсиз қолган (2026 йилда йўқ). Шунингдек, мақсадли кўрсаткичлардан келаси 5 йилда депозитлар ва кредитлар ўсиши секинлашиб бориши прогноз қилинаётганини илғаса бўлади. Амалдаги Стратегия бўйича банк бозорига камида 4 та йирик нуфузли чет эл банкларини жалб қилиш вазифаси эса лойиҳадан тушиб қолган.