Bank of Georgia қайси давлат бонкасига кўз тиккан? Грузиянинг Bank of Georgia'нинг хўжайини — Lion Finance Group холдинги Ўзбекистондаги йирик, бўлгандаям банк бозорининг Топ-5талигига кирувчи бонкаларга қизиқаётгани кеча ўзбек ОАВларида роса муҳокама бўлди. Аввало, айтиш керакки, Bank of Georgia Ўзбекистонга бегона эмас, мазкур гигант молия институти мамлакатимизга кириб келиши учун яшил чироқлар 2,5 йил аввал ёқилган. Банкка нисбатан мамлакатимиз регуляторларида ўта лоял муносабат шаклланганини шундан билса бўладики, Bank of Georgia капитал бозори соҳасидаги “Тартибга солиш қумдони” нинг биринчи иштирокчиси ҳисобланади. Шу билан бирга Bank of Georgia давлат қимматли қоғозларининг илк хорижий харидорларидан. Энди Bank of Georgia радарига тушиши мумкин бўлган йирик ўзбек банклари эҳтимолий рўйхатига қайтсак. Ўзбекистондаги энг йирик Миллий банк ва унинг орқасида фаол қуваётган яна бир гигант Агробанк хусусийлаштирилмайди. Ҳар икки банк аввалги стратегияларда ҳам, янгиланган стратегияларда ҳам давлат назоратида қоладиган молия институтлари ўлароқ саналган. Кейинги ўринлардаги Ўзсаноатқурилишбанк учун хусусийлаштириш модели бир томондан Халқаро молия корпорация билан ҳамкорликда, иккинчи томондан эса Миллий инвестиция жамғармаси муваффақиятли IPO'си йўналишида кетмоқда. Асакабанк бўйича ҳам ЕТТБ билан келишувга узил-кесил оғиз солинган. Хўп, топ-5дан ким қолаяпти? Халқ банки. Айнан давлат бонкалари орасида энг сифатли ва самарали трансформацияга учраган Халқ банки Миллий инвестиция жамғармаси портфелидан чиқарилгани эсингиздами? 2025-2028 йилги Фискал стратегияда давлат улуши сақлаб қолиниши белгиланган банклар қаторида Халқ банки кўрсатилган бўлсада, 2026-2029 йилги Фискал стратегиядан хусусийлаштирилмайдиган давлат банклари рўйхатидан Халқ банки тушиб қолган.