Қиммат январь: Суғуртадан имтиҳонгача, пропандан гўштгача, уяли алоқадан кўмиргача Январь ойи якунлари билан ойлик инфляция 0,7%ни, йиллик инфляция 7,2%ни ташкил этган. Ой давомида озиқ-овқатлар 0,8%га, ноозиқ-овқатлар 0,4%га, хизматлар 0,8%га ошган. Ҳудудлар қирқимида ойлик инфляция кўрсаткичи ғаройиб тарзда текислашган (0,6-0,7%). Йиллик ҳисобда энг юқори инфляция Фарғонада сақланган (7,7%). Муҳим озиқ-овқатлардан картошка 1,9%, сабзи 1,8%, гўшт 1,6%гача, пиёз 1,2%, сут ва шакар 1,0% қимматлаган. Расмий статистика қаҳратон январда аҳолини энг кўп қақшатган автосуғуртанинг 381,8%га, ҳайдовчиликка имтиҳон топширишнинг 5%га, уяли алоқанинг 2,4%га, кўмирнинг 2,3%га, ўтиннинг 1,7%га ошганини сезган холос. Авторақамлар билан боғлиқ нарх сакрашлари умуман қайд этилмаган. Шунингдек, бошдан оёқ энергокризис билан ўтган январда пропан 8,9%га, бензин 0,6%гача, ўзи жисмонан йўқ метан эа 0,1%га қимматлаган деб топилган. Бундан ташқари тиббий хизматларнинг 1,5%гача, иссиқ сувнинг 0,9%га ошгани маълум қилинган. "40-60%гача арзонлайди" дейилган дори-дармонларнинг арзонлашиши очиқ кўз билан ҳам, расмий статистика билан ҳам ҳали қайд этилгани йўқ.